Shillong, Nailar 16
U Myntri Rangbah ka Jylla, u Conrad K. Sangma ha ka Sngi Balang u la ong ba ka kam ha ki tnad treikam Sorkar ka duna bad ka Sorkar Jylla ka pynleit jingmut ban thaw shuh ïa ki lad ki lynti na bynta ki samla haba ïadei bad ka jingseng kam lajong.
Haba ai jingkren ha ka ‘Rozgar Mela’ ba la pynlong da ka NEHU, Shillong, u Myntri Rangbah u la ong ba ka Sorkar ka ïohi jngai ïa ki sienjam bapher-bapher ban tehlakam ïa ka jingeh ha ka liang ka jingkyrduh kam.
U la ong ba ki kam Sorkar nalor kito ki kam ba ïadei bad ki ‘Agency’ ka Sorkar ki duna bha – ki jingkheiñ ki pyni ba kim tam ïa ka 1200-1500 tylli (ki kam) ha ka shi snem, da kaba kynthup lang ïa ki tnad treikam bapher-bapher.
U la kdew ruh ba wat hapdeng ki jingpher kiba kumne-kumtai, ka jinglait jong ki kam ha ka shi snem ka long kumba 1200 tylli.
Ha kajuh ka por, u la ban jur halor ka jingdonkam ïa ka sienjam ka ban kynthup lang ïa baroh ban khmih bniah ïa kane ka jingeh, kumjuh ban pynpaw ba kim don kino-kino ki jubab kiba dei ne lait, hynrei kaba donkam ka long ban shim ïa ki lynti kiba ïalam sha ka jingmanbha ha ki kyrdan bapher-bapher ban khmih bniah ïa ki jingeh haba ïadei bad ka jingkyrduh kam.
Halor ka jingdonkam ïa ka ‘Skill Development’ bad ka ‘Language Proficiency’, u Myntri Rangbah u la kren halor ki lad ki kabu na bynta ki nongshong shnong ka Jylla ban phai khmat sha ki kam shabar-ri – China, Japan, Germany, UK, bad Australia.
Na ka liang u Vice-Chancellor ka NEHU, Prof. Prabha Shankar Shukla, u la kren halor ka jingïakynduh jong ki jingangnud bapher-bapher bad ki lad ki kabu kiba ka ‘Rozgar Mela’ ka wanrah bad ka.
Ha ryngkat 7000 tylli ki kyrdan haba ïadei bad ki kam bapher-bapher, kane ka prokram ka ïeng halor ka jingtrei minot ka NEHU ban pynwandur ïa ka sap ka phong jong ki samla, ha kajuh ka por, ban kyntiew ïa ki sha ka lynti jong ka jingseisoh.
Shuh shuh u Vice-Chancellor u la ban jur halor ka jingkynthup lang jong ka prokram da kaba plie lad ïa kito kiba la pyndep ïa ka jingpule naduh klas 10 haduh ‘Post-Graduation’.
Ka North-Eastern Hill University (NEHU) ka la shim ïa ka sienjam ha ka ban pynkup bor ïa ki samla da kaba pynlong ïa ka ‘Rozgar Mela’ kaba 3 sngi da ka jingthmu ban tyrwa ïa ka kabu sha ki hajar ngut khun samla ha ka liang ka kam ka jam.
Kane ka prokram ka la sdang ha ka Sngi Balang bad kan neh haduh ka 18 tarik mynta u bnai.
Ha kane ka sngi, ka ‘Rozgar Mela’ ka la sakhi ïa ka jingpynrung kyrteng ba palat 3000 ngut ki nongwad kam.
Ki kompeni pawnam ba kynthup ïa ka ‘TimesPro’, ‘Adecco’, ‘Sudexo’, lem bad kiwei-kiwei ki la ïashim bynta ha kane ka prokram.
