Tura, Nailar 16
Ka A’chik NEHU Students’ Union (ANSU), Shillong ka la pynrem jur halor ka jingshah thombor jong uwei na ki dkhot jong ka ha ki runar ki bym lah ban ithuh satia bad kyntu ïa ki bor pynïaid ka NEHU kumjuh ki bor pulit lem bad ka Sorkar Jylla ban pynshitom da kaba tyngeh ïa kito kiba donkti ha katei ka kam.
Katkum ka jingïathuh ka seng, katei ka jingjia ka la jia ha ka 13 tarik mynta u bnai ha Hostel No. 20 jong ka NEHU ha ka por kumba 11 baje mynmiet ha kaba uwei u samla pule LLM uba dei ruh u nongaibuit ka ANSU u la shah thombor ha ki runar ki bym lah ban ithuh satia.
Na ka liang ka seng ka la dep ban ujor ejahar ruh halor katei ka jingjia.
“Kam dei ka jingïashrut hapdeng ki jaidbynriew hynrei ka pynthut ïa ka shong suk shong shngaiñ. Ki samla pule kiba wan nabar Shillong ki sah ha ki Hostel ka NEHU naba ki long kiba shngaiñ bad kiba biang ïa ki hapoh ka skulbah. Ka skulbah ha ka jingshisha ka dei ka jaka ka ban pynwandur ïa ki samla pule ban long kiba tipbriew bad ba kitkhlieh bad ym dei ban ai lad saita ïa kiba kum kine ki jait kam hapoh ka skulbah,” la ong ka seng ha ka jingujor sha u Vice-Chancellor ka NEHU.
Shuh shuh ka seng haba kyrpad ïa ka tnad pulit ban leh eiei halor katei ka jingjia, ka la dawa ruh na ki bor pynïaid ka skulbah ba ym dei ban shah ïa kito kiba donkti ban sah ha Hostel khnang ban kiar na kiba kum kitei ki jait jingjia hadien habud.
