Shillong, Nailar 16
U Superintendent of Police (SP) ka East Khasi Hills, Bah Sylvester Nongtnger u la ong ba kam don kano-kano ka jingshah khlong khmat na ka metïap jong u rangbah ba la lap na Boucher Road, Shillong.
“Ha ka 12 tarik mynta u bnai ha ka por 2:00 baje mynsngi, ka Cantonment BH ka la ïoh pdiang ïa ka jingujor jah rngai na u Bah Teiborlang Kharmutee (38 snem ka rta) kaba kdew ba u hynmen jong u, uba la tip kyrteng kum u Bah Rishad Sing Kharmutee na Mawdiangdiang, Shillong, u la jah rngai naduh ka 11 tarik mynta u bnai ha ka por kumba 5:00 baje janmiet,” la ong u SP ha ka kyrwoh khubor.
Ka jingujor ka ong ruh ba la ïohi khatduh ïa utei u rangbah ha jaka ïeng bos jong ka Tynring ha Ïewduh.
U Bah Nongtnger u la ong ba mar kumta hi la pynlong ïa ka jingwad ban lap ïa utei u rangbah (ba la jah) ha kylleng sawdong ki jaka ba hap hapoh ka jingpeit ka Cantonment BH lem bad ki jaka ba marjan hynrei ym shym la lap satia ïa u.
Kumta na ka liang ka Police Control Room ka la pynsaphriang ïa ka jingtip sha baroh ki OC & IC jong ka distrik. Ha kajuh ka por, la phah jingtip ruh sha baroh ki OC & IC ha kylleng ka Jylla bad India baroh kawei ha ryngkat ki dur ki dar jong utei u rangbah ba la jah ha katei kajuh hi ka sngi.
Ka kyrwoh na u SP ka ïathuh ba ha ka 14 tarik mynta u bnai ha ka por kumba 8:40 baje mynmiet la ïoh pdiang ïa ka jingtip ha Cantonment BH na thanad Sadar, Shillong ba kumba 5:45 baje janmiet la lap ïa kawei ka metïap na nala kaba ha Boucher Road, Shillong bad la pynkit noh ïa ka met sha Civil Hospital, Shillong na bynta ban pynithuh bad leh ïa ka ‘Post Mortem’.
Ha katei kajuh hi ka janmiet ki bahaïing ki la lah ban pynithuh ïa ka met ba ka dei jong utei u rangbah ba la jah – Bah Rishad Sing Kharmutee bad la pyndep ïa ka ‘Post Mortem’ ha Shillong Civil Hospital, Shillong ha ka sngi kaba bud.
Shuh shuh ka ‘Post Mortem’ ka kdew ba ym shym la don dak mynsaw na shabar ne hapoh ka met jong u.
“Ym shym la don ka jingshah khlong khmat kumba la kdew ha katto-katne ki lad pathai khubor. La shem ba u don jingshitom ha u klongsnam bad ïa ki nongmuna la phah sha ka FSL na bynta ka jingpeit bniah. La pynngat mukotduma ‘U.D. Case’ ha thanad Sadar, Shillong bad ka jingtohkit kaba bniah ka dang ïaid ban pyntikna shuh ïa ki jingshisha halor kane,” la ong utei u heh pulit ka distrik.
