Shillong, Nailar 16
Kawei ka seng kaba thymmai kaba la tip kyrteng kum ka National Liberation Council of Nongkyndong (NLCN) ka la paw pyrthei kum ka seng lehnoh kaba dei na Khasi Jaiñtia. Ïa kane la pyntikna da ki pulit hadien ba ïoh ban kem noh ïa 7 ngut ki dkhot kane ka seng kaba la dep pynkhreh ruh ban phah ïa ka kynhun banyngkong ban leit shah hikai sha Nagaland.
Katkum ka khubor ba la pyllait ha ka janmiet sngi balang da u Deputy Inspector General of Police (Eastern Range), u Davis Nestell R Marak, la ong ba ki jingtip ba tikna lyngba ka tnat syntiat la ïohpdiang da ki pulit ka Jylla ba kawei ka seng lehnoh kaba thymmai kaba tip kyrteng kum ka “National Liberation Council of Nongkyndong (NLCN)” la thaw ha Khasi & Jaiñtia Hills da ki samla kiba thmu ban pynibor ïa ka Sorkar bad ban leh ki kam beaiñ kum ka jingthied tiar siat bad kuli, ban dawa pisa, nalor ka jingpynrung dkhot ban kieng suloi bad ban ïoh jinghikai pyntbit ki dkhot kiba kieng suloi, ban thaw ktem lehnoh bad ban ïasylla ban leh ïa ki kam pyntriem.
La ong ba ka NLCN ka la ïateh lok bad kiwei ki seng lehnoh kiba na Nagaland. Kane ka seng ka la dei ban phah ïa ka kynhun kaba nyngkong jong ki dkhot jong ka (1st batch) ban leit shah hikai pyntbit sha Nagaland ha ka 17.08.2023.
Kumta halor ki jingtip ba la ïohlum, ki pulit ki la pynlong ka jingwad bad jingthwet ban ïoh kem ïa ki dkhot ka NLCN ha ka step jong ka 16.08.2023 ha kaba 7 ngut ki dkhot kane ka seng la ïoh kem noh na kylleng ki jaka kynthup uwei u khynnah rit uba la ïoh kem na East Khasi Hills District.
Kine ki 7 ngut ki dkhot ka NLCN kiba la shah kem ki kynthup ïa u “Chairman”, “Commander-in-Chief,” “General Secretary” bad “Area Commander” ka West Khasi Hills, “Area Commander” ka Jaiñtia Hills. La ïoh kem ruh ïa u nongpynrung dkhot bad uba buh jingthoh jong ka NLCN nalor 3 ngut kiwei pat ki dkhot.
Ha ki jaka kiba la dep tip ba treikam ki dkhot kane ka seng lehnoh la leit ban wad bad la lap ïa ki tiar ki tar kiba tikna kynthup ki mobile phone nalor ki kot ki sla.
Ka khubor pulit ka la ong ba ka dang shim ki lad baroh na ka bynta ban ïoh kem ïa kiwei pat ki dkhot ka NLCN bad ka jingtohkit ka dang bteng.
Kumta na ka liang ki pulit ki la pynrung kum ka kam runar ha Crime Branch Police Station, Eastern Range, Shillong, hapoh ki kyndon kiba bun tylli jong ka Indian Penal Code and the Unlawful Activities (Prevention) Act.
