Shillong, Nailar 16
Ka Asian Development Bank (ADB) ka la mynjur ban ai ïa ka ram kaba $40.5 Million na ka bynta ka projek ba la ai kyrteng “Integrated Early Childhood Development (ECD) and Maternal Mental Health” ban pyntreikam ha Meghalaya. Na ka liang ka sorkar Meghalaya, kan bei $15.27 Million sha kane ka projek.
Ha u kyrwoh khubor ha ka Sngi Balang na ka ADB, la ong ba katei ka projek kan pynkhlaiñ ïa ka jingai jingsumar ïa ki khyllung ha ïing ha sem (Home-Based Childcare) kiba hapdeng 0-1.5 snem ka rta, bad ka jingsumar ha ki Anganwadi na ka bynta kito kiba hapdeng 1.5 snem haduh 6 snem ka rta.
Ka ADB ka la ong ba katei ka projek ka thmu ban pynbha ïa ka jingïoh ïa ki lad sumar sukher, ba kynthup ïa ka jingsumar ïa ka bor pyrkhat jong ki kmie bad kumjuh ruh ki kpa ha ka liang ka jingsumar ïa ki khun.
Shuh shuh ka ADB ka la ong ruh ba katei ka ram kan ïarap ban pynbha ïa ka bam ka dih da kaba ai da ka pylleng sha ki kmie kiba armet bad kiba dang ai buiñ, bad kumjuh ruh sha ki khynnah kiba hapdeng 0.5 haduh 6 snem ka rta.
Kum ka sienjam ban ïada ïa ka mariang, lyngba katei ka projek yn tei ïa kita ki ‘Nutrition Garden’ ha ki Anganwadi Centre (AWC) khnang ban pynbha ïa ka bam ka dih.
Nalorkata, ka ADB ka la ong ba ki 1,000 sngi banyngkong ki long ki bakongsan tam na ka bynta ka jingpynheh pynsan ïa ki khyllung. Ka jingai ïa ka bam ka dih kaba janai bad ka jingsumar sukher da ki kmie ki kpa ki long ki nongrim ki ban tei ïa ki khyllung, la ong u Principal Health Specialist ka ADB, u Dinesh Arora.
“Ka ADB ka long kaba skhem ban kyrshan ïa ki jingpyrshang ka sorkar jylla ban pyntreikam ïa ka ECD bad ban pynbha ka jingsaiñdur ïa ka projek khnang ba yn lah ban leh kumjuh ha ka Ri baroh kawei,” la ong ka ADB.
Shuh shuh la ong ba lyngba katei ka projek, yn pynthymmai ïa 1,800 tylli ki Anganwadi Centre bad yn tei thymmai ïa kumba 600 tylli ki Anganwadi Centre bathymmai ha ki jaka kiba kyndong jong ka jylla. Ïa kine ki Centre yn pynlong kum ki shlem ban peit bad sumar ïa ki khyllung khynnah ha ka por mynsngi bad yn buh ïa kawei ka ECD Educator ban ïarap ïa ki khyllung ba hapdeng 1.5 snem bad 3 snem ka rta nalor ki khyllung kiba hapdeng 3 haduh 6 snem ka rta.
Kan don ka ‘grant’ kaba $2 Million na ka Japan Fund for Prosperous and Resilient Asia and the Pacific na ka bynta ban saiñdur ïa ka rukom ai jinghikai ïa ki nongtrei ha ki Anganwadi Centre bad ki ECD Educator.
Shuh shuh yn shna ïa ka State Resource Centre na ka bynta ki kam ki jam kiba ïadei bad ka projek ECD.
