Shillong, Nailar 16
Ka kmie kaba dang 26 snem ka rta kan hap ban bsa ïa ki san ngut ki khun kiba dangrit hadien ba u kpa uba kit ba bah ïa ka ïing ka sem u la khlad noh na kane ka pyrthei. Kane ka la jia ïa ka ïing ka sem jong ka Kong Merrisha Shangpliang kaba shong ba sah ha Mawdiangdiang, New Shillong.
Kane ka jingkit ïa ka lyngkor kaba khia ka dei namar u kpa ka ïing u Bah Richard Sing Kharmuti uba dang 37 snem ka rta ïa kaba la suba ba u la shah pynïap ha ki runar hadien ba u la jah na ka jingleit die sying sha Ïewduh ha ka 11 tarik mynta u bnai.
Kitei san ngut ki khun ki long uba nyngkong u dang dap 8 snem ka rta bad iba khatduh dei ba dang shu dap ar bnai.
Ha ka jingleit buddien u nonglum khubor U Nongsaiñ Hima la lap ba ka ïing sah jong ka Kong Merrisha Shangpliang ha Mawdiangdiang ka don tang ar kamra bad kawei ka jaka shet hynrei ki la ïasah lang bad ki bahaïing hasem.
Katkum ka jingbatai ka Kong Merrisha ka la ïathuh ba u Bah Richard u la mih na ïing ha ka por 9 baje mynstep jong ka 11 tarik mynta u bnai ban leit die ïa u sying sha Ïewduh ha ka jingkhia kaba don palat ar mon, hynrei ha ka por 7 baje janmiet haba ka la pyrshang ban phone ka la lip noh.
Haba u kpa ka ïing um wan shuh sha ïing haduh ka por 10 baje mynmiet ki la pyrshang ban leit wad bad pyntip ruh sha shnong trai jong u sha thaiñ Nongthliew.
Kumta ha ka sngi kaba bud ki bahaïing ki la leit ai da ka ejahar sha ki pulit Cantonment Beat House. Ha ka 14 tarik mynta u bnai ki pulit ki la pyntip ba ki la lap ïa u Bah Richard Kharmuti bad la rah noh ïa ka met ïap jong u sha Civil Hospital Shillong.
Hadien ba la dep leh ïa ka post mortem ha ka 15 tarik mynta u bnai, ki bahaïing hasem ki la rah noh sha ïing ban pyndep ïa ka jinglehniam rukom bad leit tep noh ha kajuh hi ha ka sngi.
Kumta ka Kong Merrisha ka la pynpaw ïa ka jingsngewsih kaba jur namar ka jingkhlad noh u kpa ka la buh jingeh ïa ka kum ka ’riew kynthei ban pyndap ïa ki san ngut ki khun.
Ka la ïathuh ba u sying kaba u la leit die sha Ïewduh u dei uba la rep hi ha lyngkha hynrei kam poi pyrkhat ba kan mad kum kane ka jingjia ba sngewsih haba barabor u ju leit die hi ïa u sying uba la rep ha lyngkha.
