Khanduli, Nailar 16
Wat la kam don ka jingpynbna paidbah ha kaba ïadei bad ka jingpynkynriah ïa ka Entry Tax Gate ne ka khyrdop khrong khajna ka Karbi Anglong Autonomous Council (KAAC) kaba la buh la saw bnai mynshwa ha Khanduli, hynrei ïa kane ka khyrdop la weng noh ha ka sngi Balang.
Ïa kane la pynbna da u Symbud Myntri Rangbah ka Jylla bad Chairman Regional Committee, West Jaiñtia Hills District u Bah Sniawbhalang Dhar bad u Myntri Sorkar ka Assam bad Chairman Regional Committee West Karbi Anglong District (WKAD) u Pijush Hazarika.
Ka Regional Committee West Jaiñtia bad Karbi Anglong District ki la hiar sha ka shnong Khanduli ha ka Sngi Balang ban pynlong jingïalang bad ki nongïalam shnong bad dkhot ka Dorbar Shnong Khanduli ha madan ïalehkai ka Khanduli bad hadien pat bad ki paid Karbi ha Police Border Outpost ka Assam, ha Khanduli.
Ha ka jingïalang kaba nyngkong bad ka Dorbar Shnong Khanduli, u Chairman, Regional Committee WJHD bad Chairman Regional Committee WKAD ki la ïoh pdiang ïa ka dorkhas na ka Dorbar Shnong Khanduli halor ki lai tylli ki mat jingdawa.
Kaba nyngkong ka mat jingdawa ka dei ban weng shwa ïa ka Entry Tax Gate ka KAAC mardor, kaba ar ban weng ïa ki pulit Assam ha ka jaka ba buh ïa ka khyrdop bad ba khatduh ka long ban weng ïa ka ktem jong ki pulit Assam ha Khanduli.
Hadien ba la kut ka jingïalang ha ka madan Khanduli, ki nongïalam bad dkhot ki Regional Committee ki la hiar dalade sha ka Entry Tax Gate ka KAAC ha Khanduli lane ka Am-ih kaba la tip ha Assam bad la kam ba kam don shuh kane ka khyrdop khrong khajna ka KAAC, katba ki pulit Assam katkum ka jingkam ka bor pynïaid distrik ka West Karbi Anglong la buh ha kane ka jaka ban pahara na ka bynta ban pynneh ïa ka shongsuk shongsaiñ.
Ki Regional Committee ki la bteng shuh shuh ïa ka jingjurip haduh ha Zero Point ha Khanduli kaba shim ba u dei u pud jong ka West Jaiñtia Hills District.
Hadien ka jingjurip ïa kine ki ar tylli ki jaka, ki Regional Committee ki la pynlong ïa ka jingïalang bad ki nongmihkhmat na ki jaitbynriew Karbi bad ki nongïalam ki sengbhalang kiba kynthup ka Karbi Students Association (KSA), Socheng Amreng Border Development Committee, Karbi Anglong Autonomous Council (KAAC) bad kiwei kiwei.
U Bah Sniawbhalang hadien ka jingïalang u la ong ba ïa ka Entry Tax Gate kaba don ha katei ka jaka la weng, katba ki pulit Assam ki dang don ban ai ka jingpahara. U la ong ruh ba ka Committee ka la wan hiar jurip ïa ka Khanduli ban pynthikna ban wanrah ïa ka jingsngewskhem ki nongshong shnong bad ban wanrah ïa ka jingshong suk shongsaiñ ha kane ka thaiñ khappud.
U la ong ruh ba baroh ar tylli ki Regional Committee kin pynsngew sha ki Myntri Rangbah jong baroh ar tylli ki jylla ïa kaei kaba ki lap ki shem ha kane ka jingjurip.
U Pijush Hazarika ruh u la ong ba la weng ïa ka khyrdop lum khajna ka KAAC. U la ong ba kane ka khyrdop kam lah ban lum khajna na ki nongshong shnong ka jylla Meghalaya, hynrei na ki nongshong shnong ka Karbi Anglong bad u la kren shai ruh ba ki pulit ka Assam ki donbor ban lum khajna.
U la ong “Ngan pynsngew ïa kane ha u Myntri Rangbah ha kaba ïadei bad ka jingïalang bad ki dorkhas ba la ïoh pdiang ha baroh ar tylli ki jingïalang.”
Haba ban ïa ka jingkren ba ka jaka jong ki kam dei ban leit sha Meghalaya, u nongïalam ka Karbi Students’ Association (KSA) u Mirjeng Kro u la maham, da kaba ong, “Lada ngi duh ïa ka jaka jong ngi ha ka Meghalaya, kane ka thaiñ kan long kum ka Manipur.”
U la kren shai ba u pud u sam ka Karbi Anglong u dei katkum ka byrta ne Notification 1951 bad kam don jingmut ba balei ba ki jaka jong ki, kin leit sha Meghalaya.
Ha kane ka jingïalang nalor ki nongïalam ka Regional committee, na ka liang ka Assam la donlang u Rupsing Teron, MLA Baithalangso, u Headsing Rongphar, MAC KAAC, D. Uphing Maslai, EM KAAC, Avijit Kro, MAC KAAC, Krishna Barua, DC West Karbi Anglong. Katba na Meghalaya nalor u Bah Sniawbhalang la ïadonlang u Myntri Sorkar, Bah Coming Ymbon, u Bah Nujorki Sungoh MLA Mowkaïaw, DC, SP bad kiwei kiwei.
