Shillong, Nailar 16
U Myntri Rangbah ka Jylla Conrad K Sangma ha ka Sngi Balang u la plie paidbah ïa ki jingtei jong ki kam jngokai pyrthei ba la tip kum ki ‘Travellers Nest’ ha ka shnong Kyiem, Mawphlang. Ha kane ka sngi la ïadon lang ryngkat u Myntri ka tnat ki kam jngohkai u Bah Paul Lyngdoh.
Ka jingtei ïa ki ‘Travellers Nest’ ka long kum shi bynta ban kyntiew ïa ki kam jngohkai pyrthei bad ha kaba yn lah ban pynbiang ïa ki jingdonkam jong ki nongwan kai. Ha kane ka Travellers Nest ki don haduh 5 tylli ki cottage ne ki jaka sah bad kumjuh ruh ka restaurant ne ka dukan ban pynbiang ïa ki jingbam.
Ka jingplie ïa kine ki jingtei, ïa kaba la bei tyngka da ka Meghalaya Age Limited (MAL) lyngba ka Meghalaya Rural Tourism Cooperative Federation Ltd, ha ka jinglut kaba la kot haduh T.94 lak ka dei u mawmer ba kongsan ha ka jingpyrshang jong ka Sorkar ban pynkhlaiñ ïa ka jingïatreilang jong ki shnong ki thaw ha kaban kyntiew ïa ki kam jngohkai pyrthei.
Haba ai jingkren hadien ba la plie ïa kine ki jingtei, u Myntri Rangbah u la ban jur halor ka jingkongsan jong ka jingïatrei bad ïashim bynta lang da ki shnong ki thaw ban kyntiew ïa ka ïoh ka kot jong ka jylla.
U la ong, “Ka Meghalaya kan ym lah ban kynjoh ïa ka jingkiew shakhmat tang da ka jingtrei marwei ka Sorkar, kumta ka long kaba donkam ban don ïa ka jingïatreilang naba baroh ki kynhun ki don ïa la ka bynta ban leh bad ban ithuh ïa kine ki bynta haba buh ïa ka thong hakhmat eh ha ka jingmut jingpyrkhat ka long kaba kongsan bha”.
“Ka bor jong ngi ka shong ha ka jingïashimbynta lang ki shnong ki thaw, kaba ngi la kyrshan ha kaban kyntiew ïa ka ïoh ka kot,” u la ong bad bynrap “Ka kam jngohkai ka dei ka kam ba kongsan bha ïa ngi. Ka thong jong ngi ka long ban thaw ïa ka lad ïoh kam ïoh jam ba kot 1 lak ngut ha kane ka kam lyngba ki jingseng kam jong ki kynhun bapher bapher.”
Haba pyntip ïa ka jingkongsan ban pynbha ïa ki surok hapoh ka Jylla, u Conrad u la ong ba ka jingshna pynbha ïa ka surok na Mawphlang sha Weiloi ka dei ka jingai sakhi jong ka Sorkar halor ka jingkut jingmut ban buh hakhmat eh ïa ka kam ban pynkhlaiñ ïa ki lad pynïasoh lyngba ki surok hapoh ka Jylla.
Ha kane ka sngi, u Myntri Rangbah u la pyllait paidbah ruh ïa phra tylli ki Prime Tourism Vehicles ne ki kali kit nongshang kai pyrthei.
