Jowai, Nailar 17
Ka seng ki nongbylla sngi ka la kyrpad ïa u Myntri Rangbah ka jylla u Conrad K Sangma ba un ïarap lem ïa ki khun jong ki nongtrei bylla sngi ban pynïoh bhah kumba 10% ha ka rukom thung kam thung jam bad ka bhah pule puthi.
Ïa kane la pynsngew da u nongai buit ka seng u Khroolamsalanki Pariat ha u Myntri Rangbah ka jylla u Conrad K Sangma uba la wan shim bynta ha ka ‘8th Annual General Meeting’ jong ka All Jaiñtia Muster Roll Workers & Labour Union, Central Executive Committee (CEC) ryngkat ka jingïatreilang ka Union of Cook cum Helpers PM Poshan, Meghalaya, Jowai kaba la long ha Madan Kawang, Ummulong ha ka Sngi Palei.
“Ngi kyrpad ïa ka sorkar ba kan ïarap ïa ki khun jong ki nongtrei bylla sngi ban pynïoh bhah kumba 10% ha ka thung kam thung jam bad ka pule puthi namar bun ki khun jong ki nongbylla ki shem shitom ban bteng ïa ki jingpule kiba shakhmat”, la ong u nongai buit u KL Pariat.
Une nongai buit ka seng u la kyntu ruh ïa u Myntri Rangbah ban ai ka jingïada ïa ki wah kiba don hapoh ka Ri-lum Jaiñtia kum ka wah Kupli, Myntdu, Myntang bad ka Myngngot khnang ban ïoh ïa ka umbam kaba khuid.
Na ka liang u Conrad haba ai jingkren u la ai khublei ïa ka seng kaba la kynjoh 8 snem bad u pynpaw ruh ka jingkmen ban ïadon bynta ha ka sngi leh kmen ka seng. Ha ki san snem kiba la leit shadien, la mih ki jingtynjuh kiba har rukom khamtam ka kam pud kam sam kaba dang sahteng la 50 snem haduh mynta mynne, la ong u Conrad da kaba bynrap ba ka jingjop ilekshon ha u 2023 ka pyni ba ki paidbah ki shaniah ïa ka sorkar MDA.
Ha kaba ïadei bad ki jingeh jong ki nongtrei Muster Roll na ka jingslem jong ka tulop, u Myntri Rangbah u la kular ban shimkhia bad ba un khmih ba kan don ka jingïatreilang hapdeng ki tnat sorkar bad ban hukum ruh ïa ka tnat pla tyngka ba kan pyllait lypa lai bnai shwa ïa ka pisa sha ki tnat sorkar khnang ban lah siew biang por ïa ka tulop jong ki.
Nalor nangta haba pynpaw halor ki jingeh kiba ki Muster Roll ki ïakynduh namar ka jingbym ïoh ïa ki jingsiew ha ka por kaba biang, na ka liang u Conrad u la ong ba hadien ba ki la shimti ïa ka sorkar ha u snem 2018, ki la don lypa ki jingeh kiba ïadei bad ka jingpynslem ban siew ïa ka tulop sha ki nongtrei Muster Roll na kiba bun ki daw, hynrei u la kular ban shimkhia mardor ban weng ïa kine ki jingeh.
U la ong ruh ba kane ka mat kaba ïadei bad ka jingsiew biang por ïa ka tulop ka dei kaba shem shitom namar ki don bun bah ki nongtrei Muster Roll ha ka jylla. Kane ka jingeh ka dei kaba la slem bah, hynrei hadien ka jingïai buddien suki-suki la nang lah ban weng ïa ki jingeh bad mynta kiba bun na ki nongtrei Muster Roll ki la ïoh ïa ki tulop ha ka por kaba biang.
Haba pynpaw halor ka jingdonkam ban kiar na ki kam saiñ hima bad ban shim ïa ki rai kiba phaikhmat sha ka bha ka miat jong ki paidbah, u Conrad u la ong ba ka jingshakri ïa uwei-pa-uwei u nongshong shnong, kata naduh ki myntri sorkar haduh ki nongrep ki don ïa kajuh ka jinglong kongsan. U la ong ruh ba ka thong jong ka sorkar ka long ban weng ïa baroh ki jingeh jong ki nongshong shnong.
Nalor kata u la ong ruh; “Haba ngi la shimti ïa ka sorkar ki paidbah ki khmih lynti ïa ngi ba ngin lah ban weng noh mardor ïa ki jingeh kiba la don ha ka jylla mynta la kumba 50 snem kynthih, bad kane ka dei ka mat ka ban kham shim por bad ngan trei borbah ban kyntiew ïa ka jylla Meghalaya da ka jingkyrkhu bad ka jingkyrshan jong ki paidbah.
Kham ha shwa u Conrad u la pynkup burom ruh ïa u samla uba wan na ka longïing jong ki Muster Roll uba wan ha ka kyrdan kaba shakhmat ha ka eksam SSLC mynta u snem.
Nalor kata, ka la don ruh ka jingpynkup burom na ka bynta u Myntri Rangbah da ka seng ki Muster Roll halor ka jingkyntiew ïa ka tulop bad honorarium.
