Khliehriat, Nailar:
Ka Synjuk Dorbar Shnong ba kynthup ïa 21 tylli ki shnong ba hap ha ka Pamrapaithlu PHC ha ka 15 tarik mynta u bnai ki la ïohlad ban pynsngew bad ai da ka jingthoh ïa ka Myntri ka tnat ka Koit ka Khiah ka jylla ka Kong Ampareen Lyngdoh. Kane ka dei hadien ka jingwan peit jong ka ïa kane ka PHC kaba dang don shibun ki jingduna ba dang donkam ban pynbiang khnang ba kan lah ban shakri khambha ïa ki paidbah.
Katkum ka jingthoh ba la aiti la pynsngew ïa bun ki mat jingdawa bad kawei na kita ba kham hakhmat eh ka dei ban kyntiew kyrdan noh ïa kane ka PHC sha ka CHC namar ba ka jingbun briew ka la poi sha ka 40,000 ngut. Kane ka PHC ka ju pdiang ïa 50 ngut ki nongpang OPD bad 20 ngut ki longkmie ba wan kha khun ha man la ka shibnai bad ka la buh jingeh shi kat dei na ka daw ba ym don ïa ki kamra ba biang ba kylluid.
Ka jingdon tang iwei Doctor Medical & Health Officer ha kane ka PHC ka la buh jingeh shi kat dei ban peit ban sumar ïa kiba pang ba shitom. Kumta ka synjuk ka la dawa ban pynïoh sa iwei Medical & Health Officer khnang ban ai jingshakri bad jingsumar ba khambha ïa ki paidbah jong ka thaiñ.
Kiwei ki jingdawa ki long ban pynïoh kali kit nongpang (Ambulance) da ka bathymmai, ka kor X-ray Machine, Ultrasound Machine, ban pynbun ki Medical Staff (Kynthei bad Shynrang) bad ki nos ha kane ka PHC.
La dawa ruh ban pynbiang ïa ka building & kiwei ki jingdonkam kaba donkam bha ban don kawei ka waiting room, Emergency Room, Labour Room, Storage Room bad ki tiar equipment ka Delivery Kits (HIV/ Non HIV) bad ka Assist Vacuum Delivery.
Na ka liang ka Myntri ka la pynsngew ba ka kloi ban shimkhia ïa kine kiei kiei baroh ki jingdonkam jingduna ban pynbiang ha kane ka PHC ha ki sngi ban sa wan bad kan sa bishar bniah ha kaba ïadei ban kyntiew kyrdan sha ka CHC.
Ka synjuk ka kdew ba hapoh ka East Jaiñtia Hills District ka don tang kawei ka CHC kata ka Sutnga CHC hadien ba la pynkiew kyrdan ïa ka Khliehriat CHC sha ka Civil Hospital. Te la i donkam shisha ban kyntiew kyrdan ïa ka Pamrapaithlu PHC sha ka CHC.
Ha kane ka jingwan ïuhkjat jong ka Myntri ha ka PHC, la synranlang da u MDC Musniang Rangad u Bah Phasmoon Dkhar, EM JHADC, u District Health & Medical Officer, EJHD Dr. D Shylla, ADC EJHD G Warjri, ha ryngkat ka jingïadonlang ka Dr. R Suchiang MHO, ki nongtrei jong kane ka PHC, ki Waheh Shnong bad ki Secretary Shnong jong ki shnong ba hap ha kane ka PHC lem bad kiwei kiwei.
