Shillong, Nailar 17
Ka jingkhlad u Bah Rishad Sing Kharmutee, 37 snem ka rta ka la pynlyngngoh ïa kiba leit ba wan bad kiba ju ïeng kali ha Them Bijoy namar ïa ka metïap jong une u rangbah la lap ha ka por 6 baje janmiet na nala ha ka por ba dang ther jur u slap ha ka 14 tarik mynta u bnai.
Ha ka jingbuddien U Nongsaiñ Hima halor kane ka jingkhlad noh u Bah Rishad, la leit ban peit ïa ka jaka ba lap ki pulit ïa ka metïap ha nala kaba tuid da ka um slap kaba don hapoh ka lynti ba la siang da ka dewbilat ban rung sha kawei ka jaka kaba ju buh tiar.
Haba pyrshang ban kylli na ki nongap jaka ïeng kali, ki la pynpaw ba kim tip eiei hynrei ki shu bna ba ki pulit ki wan sei ïa ka metïap ha ka por 6 baje janmiet.
Katkum ka khubor ba la ïoh lum, la ïathuh ba ha ka por mynstep bad mynsngi kiba ïaid ba ïeng ha katei ka jaka kim shym la ïohi ïa kane ka metïap jong une u rangbah. Pynban la suba jur ba une u rangbah u dei uba la khlad kham shaneng ka lynti ban kiew sha petrol pump Anjalee. Hynrei ynda la ther u slap ka um kaba heh ka la rah ïa u sharum bad sahkut hajan ka lynti ïaid kjat.
La ïoh jingtip ba kiba lap ïa ka metïap u Bah Rishad ki la ïohi nyngkong ïa ka jingkhih ka kjat. Haba ki la leit peit ki lap ba ka dei ka met jong u briew bad mar-mar ki la pyntip noh sha ki pulit.
Namar ki bahaïing hasem ki la ïathuh ba ki ïohi lyngba ka CCTV ïa u Bah Rishad ba u kiew hapoh kali ha ka por 5:30 janmiet ha ka 11 tarik mynta u bnai hynrei u hiar biang. Naduh kata ka miet um shym la wan ïing shuh. Kumta U Nongsaiñ Hima u la ïoh ban ïakren ïa katto-katne ki nongñiah kali sha ki thaiñ Mawdiangdiang.
Kum ban shu pynkynmaw u Bah Rishad u la mih na ïing ha ka por 9 baje mynstep jong ka 11 tarik mynta u bnai ban leit die sying kumba 2 mon sha Ïewduh, hynrei naduh katei ka khyllipmat um shym la wanphai ïing shuh.
Haba ki bahaïing ki la leit pyntip noh sha ki pulit ha ka 12 tarik jong ujuh u bnai namar ka jingjah jong u, ki pulit ki la lap ïa ka metïap jong utei u rangbah ha ka janmiet jong ka 14 tarik mynta u bnai.
Hadien ba la pyndep ïa ka ‘post mortem’ ha Civil Hospital Shillong, ki bahaïing hasem ki la leit ontep noh ha ka 15 tarik mynta u bnai ha Mawdiangdiang, New Shillong.
Wat la ki bahaïing ki la lap ïa ka metïap, hynrei kim kwah shuh ban buddien halor katei ka jingjia namar kin hun noh hadien ba la lap ïa ka met.
Haba ïakren bad ki katto-katne ki nongñiah kali na Mawdiangdiang kiba ju ïeng ha Them Mawlong ki la pynpaw ka jingsngewsih haba u para thaiñ uba wan ïew wan hat u khlad noh tang namar u khlem poi shuh sha ïing.
Nalor nangta, ki la pynpaw ba wat ma ki ruh kim shngaiñ shuh ban kamai da la miet palat. Kumta ki kyntu ïa ki paidbah haba ki wan sha ïew sha hat kim dei ban sngewsyier, hynrei ki dei ban leit kloi sha ïing.
