Shillong, Nailar 17 (UNI)
Ki pulit ka jylla ha ka Sngi Palei ki la ïathuh ba u “Chairman” ka seng lehnoh thymmai – “National Liberation Council of Nongkyndong (NLCN)” – u dang dei tang u khynnah ba dang pule ha skul.
Ki pulit ki la kem ïa une u khynnah ha ka Sngi Balang hadien ba u la dep wan thoh ïa ka eksamin Klas 10 ha skul.
Nalor jong utei u khynnah, ki pulit ki la kem ruh sa ïa 6 ngut kiwei pat ba kynthup ïa kawei ka longkmie ïa kaba la kynnoh ba ka dei ka nongpynrung ïa ki dkhot sha ka NLCN bad ka nonglum ïa ki jingthoh.
Ha ka miet jong ka Sngi Balang, sa arngut ki la shah kem na West Jaiñtia Hills katba ha ka Sngi Palei, la kem sa ïa u “Area Commander” ka East Khasi Hills na Ïewduh, Shillong.
Haduh mynta, 10 ngut ki la shah kem ha ki pulit halor ka jingkynnoh ba ki dei ki nongïalam bad dkhot ka NLCN. Ki pulit ki la kurup ruh ïa ki kot ki sla bad bun tylli ki Mobile Phone na ki.
“Ka jingtohkit ba dang sdang ka pynpaw ba utei u khynnah skul u dei u “Chairman” jong katei ka kynhun lehnoh. Ngi la sdang ban tohkit ïa baroh kiba la shah kem ban sngewthuh kaei ka jingthmu ban thaw ïa katei ka kynhun NLCN,” la ong uwei u heh pulit uba khlem kwah ban pynpaw kyrteng.
La ong ruh ba utei u khynnah skul u ju ïakren bad ki katto katne ki kynhun lehnoh ba shyrkhei kiba don ha kane ka thaiñ. Namar ba u dang dei u khynnah uba hapoh 18 snem, ki pulit ki la hap ban phah ïa utei u khynnah sha ka Juvenile Home.
Ha ka histori jong ka Meghalaya, la ju ïohsngew shaphang ki kynhun lehnoh kiba pyndonkam da ki khynnah ban long kum ki dkhot jong ki, hynrei kane ka dei ka sien banyngkong eh ba u khynnah uba dang hapoh 18 snem un long u nongïalam ka kynhun lehnoh.
Kaei kaba pynsngewkhia jingmut ïa ki pulit ka long ba ki dkhot kiba la shah kem jong katei ka kynhun NLCN ki dei na ki jaka kyndong kum na Jaiñtia Hills, West Khasi Hills, Ri-Bhoi bad katto katne na East Khasi Hills.
“Kane ka dei ka kam kaba khia bha na ka bynta ki pulit hadien ba ngi la lap ba kiba bun na ki dkhot ka NLCN ki dei na nongkyndong bad khamtam hadien ba ngi la ïoh ïa ki khubor syntiat ba ki don napdeng jong ki, kiba la thmu ban leit sha Nagaland mynta ka janmiet jong ka Sngi Palei ban ïoh jinghikai ha ki katto katne ki seng ha ka jingpyndonkam ïa ki tiar siat,” la ong utei u heh pulit.
Nalorkata, u la ïathuh ba kitei kiba la shah kem ki la pynkhreh ruh kumno ban ïoh thied ïa ki tiar siat bad ki kuli na ki bynta bapher bapher jong ka thaiñ Shatei Lam Mihngi bad ban buh ruh ïa ki jaka ai jinghikai ha khappud jong ka India bad Bangladesh.
“Watla ngi la dep kem ïa kiba bun ngut na ki, ngi dang thwet shuh sa ïa kiwei khamtam kito ki nongïalam bad ki nongbei tyngka bad ban wad ïa ka jingïadei hapdeng katei ka kynhun bad kiwei pat ki seng lehnoh,” la bynrap utei u heh pulit.
Nalor u “Chairman”, kiba la shah kem ki dei u “Commander-in-Chief”, “General Secretary”, ki “Area Commander”, “Recruiter & Record Keeper”.
