Shillong, Nailar 16
U nongñiah bad u nongbud jong kawei ka trok, ki la hap ban tam biang ïa ki pylleng pyut kaba ki la bret khlem akor da ki phew phew song ha ki bynta jong ka surok Umsning By-pass.
Ki nongïalam bad dkhot ka RBYF Lum Umpih Unit ha ka 15 tarik mynta u bnai, ki la ïoh ban bat ïa kitei ki 2 ngut ki briew kiba la wan bret pathar ïa ki pylleng pyut ha katei ka bynta jong ka surok kaba hap hapoh ka shnong Lum Umpih, Umsning.
La ong ba kitei ar ngut ki la wan da kawei ka trok kaba don u nombor UP-21-CN-7756 na Silchar. Ynda ki la poi ha katei ka jaka, ki la sdang ban bret pathar ïa ki pylleng pyut bad kane ka la wanrah ka jingsma iwtung kaba jur bha.
Ïa kine ki briew la ïoh ban bat da ki dkhot ka RBYF hapoh ka jingïalam u Balakmenlang Nongbri President ka Umsning Circle bad u Henry Marngar President ka Lum Umpih Unit, katba ki dang bret ïa kine ki pylleng pyut ba la boi ksaiñ.
Kane ka jaka ka la sma iwtung hak namar ka jingpyut jong ka pylleng. Kumta na ka liang ka seng ka la hukum ïa kine ki briew ba kin tam biang ïa kine ki pylleng bad ba kin thep biang hapoh ka trok.
Halor kane ka jingjia, ka seng ka la maham tyngeh ïa ki nongleit nongwan na kane ka surok ba kim bit shuh ban bret jaboh ha ki bynta jong ka Umsning By-pass lym kumta kin ngat ha ki jingpynsaja ba tyngeh.
Nalor kata, kaba la pynbitar jur ïa ki dkhot ka seng ka dei ba dang ha kine ki khyndiat sngi la don ki ‘riew khlem akor kiba la bret masi ïap ha katei hi kajuh ka jaka. Ha kaba kut hap shim jingkitkhlieh ka seng ban tep ïa katei masi ïap.
