Nongstoiñ, Nailar:
Ka Federation of Khasi Jaiñtia & Garo People (FKJGP) Rimuliang Circle ka la pynpaw ba ka jingpynbeit pud na ka bynta ka Langpih Sector ka dei ban ïaid beit ïaid ryntih kumba ki paidbah ki angnud ha kaba ka Regional Committee kan nym dei ban leit sha ka lynti kaba bakla ha kane ka wad kaba mynta.
Haba kren sha ki lad pathai khubor ha ka Sngi Balang, ki nongïalam ka FKJGP Rimuliang Circle ki la buh ïa ka jingkyrmen ba ka Sorkar Jylla lyngba ka Regional Committee on Border Dispute West Khasi Hills hapoh ka jingïalam jong u Bah Paul Lyngdoh, Myntri ka sorkar Jylla ba kan ïaid beit ïaid ryntih kumba la angnud da ki paidbah ka thaiñ.
Shuh shuh ki la ong na ka por sha ka por ka FKJGP halor kane ka mat, ka la ïakren bad u Bah Paul Lyngdoh lem bad ka sorkar Meghalaya. Kumta kim dei ban leh klet ban sngap bad burom ïa ka mon u paidbah, ki nongsynshar shnong, nongsynshar Hima bad ka District Council.
“Ngi kyrmen da ka jingstad ki nongïalam kan long kaba bha bad ka FKJGP ka pynkynmaw ba ka jingïapynbeit pud hapdeng ka Meghalaya bad Assam kan nym dei ka ban shu leh lyndet ïa ki bor synshar trai muluk, kum ki Sordar Shnong/Headman, Syiem bad ka KHADC namar la ïohi ïa ka jingpynbeit ïa ka Malang sector ha kaba don ki shnong kiba ud ba ïam hadien ba la dep pynbeit,” la ong ki nongïalam ka FKJGP.
Ka FKJGP ka la pynpaw ruh ïa ka jingkyrmen ba ka Langpih Sector ha kane ka jingïapynbeit kan dei hi ban don lane ïoh ha ka Jylla Meghalaya.
Nalor nangta ka seng ka la buh ruh ïa ka jingmaham ïa ka Regional Committee kumjuh ïa ka sorkar ba lada ka jingïapynbeit pud na ka bynta ka Langpih Sector, kim leh ban sngap bad burom ïa ka mon ki paidbah, ki nongsynshar shnong, nongsynshar Hima bad ka District Council, kan shim da kiwei pat ki sienjam ban ïakhun tyngeh.
Nalor kata, ka la pynpaw ruh ba ha ka por ilekshon la ïohi shai ba ki nongïalam ki leit khroh vote na kito ki shnong kaba pyni shai ba ki dei ki nong Meghalaya ym tang katta hynrei ka C&RD block ruh ki hap ha Meghalaya da kaba ki ïoh ki skhim bapher kum ka MGNREGA, IAY Light bad ïa kane lah ban pynshisha da kaba leit mih ha ki ophis block.
“Ka sorkar ka hap ban pyrkhat bha ban shim ruh ha kaba ïadei bad ka kolshor, tynrai, ka ktien ka thylliej bad kiwei kiwei, bad ruh ka hap ban pyrkhat bha namar lada kine ki nongshong shnong kin hap noh sha Assam tikna kin kylla rit paid noh ha la ka jaka,” la ong ki nongïalam ka FKJGP da kaba ki la bynrap ruh “Hooid ngi shaniah bha ïa ka regional committee, hynrei ngi sngew ban ai jingmut ba shwa ban soi ïa ka MOU, donkam ba ka sorkar ha ryngkat ka regional committee kan ïamir jingmut bha bad shim ki jingthoh na u Syiem, ki Rangbah shnong, ka ophis block, ka district council bad khamtam ïa ki paidbah da kaba leit ban pynlong jingïalang paidbah ban pan ïa ka jingmynjur khnang ba kan ym wanrah kano kano ka jingsngewsih hadien habud”.
