Shillong, Nailar 17
Ka Voice of the People Party (VPP) ka pynpaw ïa ka jingsngew kyndit bad sngewsih ban tip ba ka tnat GAD (A) jong ka Sorkar Meghalaya ka la aiti ïa ka Ground Floor ne ka bynta ba sha khrum jong ka Commercial Complex ha Meghalaya House, Russell Street Kolkata sha kawei ka kompeni shimet ba la tip kum ka M/S Rocky Dhar, Umkdait Nongmensong, Shillong 793019 ban treikam na katei ka mala ba sha trai duh jong ka Meghalaya House.
Ha ka kyrwoh khubor ba la pyllait da u General Secretary ka VPP u Dr Ricky AJ Syngkon la ong ba kaba kham kyndit shuh shuh ka long ba mynta kane ka mala ka dei ka jaka treikam jong ki lai tylli ki tnat ne corporation jong ka sorkar, kita ka Tourism Information Centre jong ka Directorate of Tourism, ka Directorate of Horticulture bad ka Meghalaya Handlooms and Handicrafts Development Corporation Ltd, State Government Emporium.
U Dr Syngkon u la ong, ka jingbuh ïa kine ki tnat treikam ha kane ka Commercial Complex ka long ban pynpaw pyrthei ïa ki jingmih bad ki tiar na Jylla bad ka jingai jingtip ba donkam ïa ka Jylla ha ka kam shang pyrthei.
U la ong ba kane ka jingleh ki bor Sorkar ka pynpaw shai kdar bad kane ka sorkar ka shakri ym ïa ka jingdonkam ki paidbah, hynrei ka shakri ïa ka jingmyntoi ïa ki riewshimet.
Shuh shuh u la ong, ba la sngewthuh ruh ba ka sorkar ka la lah ban ai ïa ka ‘tender’ sha u M/S Rocky Dhar hadien ba ka la pyrshang la lai sien. “Ngi kwah ban tip na ka sorkar kumno ne ha kano ka dur la pynkylla ïa ki kyndon kat haduh ba ka lah ban pynïoh ïa ka ‘tender’ sha une u riewshimet,” la buh jingkylli une u nongïalam ka VPP.
