Nongstoiñ, Nailar 17
Ka Assembly Committee on Women and Empowerment jong ka ïingdorbar thawaiñ ka la lap ba ka West Khasi Hills ka la wan ha ka kyrdan ba ar ha ka jingbun ki case ne mukotduma POCSO.
Ïa kane, ka komiti ka la lap hadien ba ka la hiar sha kane ka district ha ka Sngi Palei bad ïoh ruh ban pynlong ïa ka jingïalang ha kamra jingïalang ka shlem treikam u DC ha Nongstoiñ ban ïakren bad sngap ïa kiba bun ki mat halor ki mukotduma ha kaba ïadei bad ki kam thombor ïa ki kynthei khynnah hapoh ka West Khasi Hills District.
Ha kane ka jingïalang kaba la lamkhmat da ka Kong Santa Mary Shylla, MLA ka Sutnga-Saipung kum ka Chairman ka Committee, la don lang ruh ki dkhot kiba dei ki MLA ba kynthup ïa ka Miani D Shira, Bah Adelbert Nongrum, Bah Gabriel Wahlang, Bah Damanbait Lamare, Marthon Sangma, Bah Matthew Beyondstar Kurbah, nalor u Superintendent of Police ka West Khasi Hills, u BD Marak MPS, Deputy Commissioner ka West Khasi Hills, ki ophisar na ki tnat treikam bapher bapher ka district bad kiwei kiwei.
Ka Kong Santa kum ka Chairman haba kren sha ki lad pathai khubor hadien ba la wai ka jingïalang, ka la ong ba ka jingthmu jong ka komiti ban wan sha Nongstoiñ ka long ban ïakren bad ban sngap ïa kiba bun ki mukotduma halor ka jingshah thombor ki kynthei khynnah kumjuh ruh ban khmih bniah ïa baroh ki mukotduma ha kaba ïadei bad ki kam sniew hapoh ka West Khasi Hills District.
Nalor nangta, ka la ong ruh ba lyngba kane ka jingïalang jong ka komiti la sngewthuh ba ki don ki mukotduma kiba la dep, bad ki don kiba dang don hapdeng ka jingtohkit bad kiba dang sahteng.
Ka Kong Santa ka la ong ruh ba ka komiti ka kyntu bad bthah ïa ki pulit bad ki nongsaid aiñ jong ka sorkar ba kin pynsted ïa ki mukotduma khnang ba kito ki lanot kin ïoh ïa ka hok khamtam ha kaba ïadei bad ki jingjia shah thombor ki kynthei khynnah.
Nalor kata, ka la ïathuh ruh ba katkum ka jingsngap, ka West Khasi Hills ka dei ka district kaba wan ha ka kyrdan ba ar ha ka jingbun tam ki POCSO Case. Kumta ka komiti ka kwah ban buddien ba kum kine ki jingjia kin nym dei ban jia shuh.
Shuh shuh ka la ong ruh ba ka komiti ka ai jingmut bad kyntu ruh ïa ka tnat pulit bad ki tnat treikam ka sorkar ba kin shimkhia ban pynlong ïa ki prokam ai jingpynshai sha ki skul, ki shnong ki thaw khnang ba ki paidbah kin sngewthuh khamtam ha kum kane ka juk jong ka jingjur ki ‘social media’.
