Shillong, Nailar 17
Ki nongdie jaiñ ha Khasi Market kiba shong ha khrum ka jaka ïeng taksi Jaïaw hajan Motphran ki la shah pynkynriah biang ha ka tnat Municipal ban phah leit shong hajrong ka jaka ïeng kali Bhoi kaba don ha Garikhana, Shillong.
Kane ka jingshah pynkynriah biang ki nongdie jaiñ ka dei hadien khyndai snem ba la phah shong ïa ki ha khrum ka jaka ïeng taksi Jaïaw namar ka jingpynpra noh ka sorkar ïa ka jingkieng kaba don ha Motphran ha u snem 2014.
Ki nongdie jaiñ ha katei ka jaka ki don palat 84 ngut. Pynban mynta ka taïew ki la hap ban lum noh ïa ki tum ki tam ban leit buh shajrong ka jaka ïeng kali Bhoi, bad naduh ka 21 tarik mynta u bnai kin sa sdang ban shong die jaiñ ha katei ka jaka thymmai ba la pynkhreh kyrpang da ka sorkar.
Haba ïakren bad ka Kong Larisuk Rani kaba dei Secretary bad Kong Shebamarlin Nongbet kaba dei ka President jong ka Synjuk Nongdie Jaiñ Khasi Market ki la ïathuh ba ki hap ban kynriah noh sha Garikhana ka dei namar ka tnat Municipal ka la mut ban pynpra ïa kane ka jaka ban shna da ka ïing saw mala bad ki la pynthikna ba ynda la dep kin sa ai biang ïa ka dukan kaba biang lut.
Ka Kong Larisuk Rani ka la ïathuh ba shwa ban mih na kane ka jaka kaba shong mynta ki la dep ïasoi ïa ka soskular bad ka municipal ba ynda la dep shna ïa ka jaka ïeng kali kaba saw mala kin ïoh ban wan shong die jaiñ biang.
“Ngi la pynkohnguh ïalade ha ki ophisar ka municipal, namar ngi sngewthuh ba ngi donkam ïa ka sor Shillong ba kan kylluid, namar kane kaba rim kam lah ban pynrung bun tylli ki kali ban ïeng” ka la ong.
Nalor nangta, ka la ïathuh ba ha u bnai Jymmang, 2023 ka municipal ka la phah jingtip ban phah mih noh na kane ka jaka, hynrei ki la leit pan por bad sa kawei ruh kine kiba shong die dukan kim shym la tip eiei.
Kumta hadien ba kine kiba shong dukan ki la ïoh lang ïa ka jingtip ban phah mih noh shipor ki la pdiang ban lum ban lang noh naduh ka 14 tarik mynta u bnai bad baroh shi taïew kin bun kam ban rah ïa ki jaiñ sha Garikhana.
