Shillong, Nailur 17
Ki pulit ka jylla ha ka Sngi Palei ki la leit rah ïa ki san ngut ki nongïalam bad dkhot ka kynhun lehnoh “National Liberation Council of Nongkyndong” (NLCN) sha ïingbishar, bad na ka liang ka ïingbishar ka la ailad ïa ki pulit ban tohkit ïa ki na ka bynta 8 sngi.
Ha ka por ba la wanrah ïa kitei ki san ngut sha ïingbishar, la ïohi ba ki pulit ki la shu pynmareh ïa ki na surok shapoh ka shlem jong ka ïingbishar ha ryngkat ka jingkah ïa ki dur ki dar.
Ka jingleit rah ïa kitei san ngut ka long hadien ba ki pulit ka jylla ki la ïoh kem ïa 7 ngut ki nongïalam bad dkhot katei ka kynhun ha ka Sngi Balang na ki bynta bapher bapher ka Ri Khasi Jaiñtia.
Ki pulit ki la ong ba ïa ka National Liberation Council of Nongkyndong (NLCN) la seng da ki samla jong ka thaiñ ha Ri-Lum Khasi bad Jaiñtia da ka jingthmu ban leh ïa ki kam be-aiñ kiba long pyrshah ïa ka sorkar bad kiwei ki kam pyntriem bad kam runar.
Ki pulit ki la ong ruh ba katei ka kynhun ka la dep ban ïakren pynbeit bad katto-katne ki seng lehnoh na Nagaland. Ha ka jingshisha ka kynhun banyngkong ban leit shah hikai sha Nagaland ka la dei ban mih na Meghalaya mynta ka sngi ha ka por janmiet.
Napdeng ki 7 ngut kiba la shah kem, uwei u dei u khynnah ba dang hapoh 18 snem.
Kumta ki pulit ki la pynngat jingujor hapoh ka Crime Branch Police Station Eastern Range Shillong ha ki kyndon IPC bad ruh hapoh ka Unlawful Activities (Prevention) Act.
Kiba la shah kem ki kynthup ïa u Chairman ka NLCN, Commander-in-Chief, General Secretary, Area Commander ka West Khasi Hills, Area Commander ha Jaiñtia Hills, ka nongpynrung kam bad nonglum bad nongbuh ïa ki jingtip jong ka seng lem bad lai ngut kiwei pat.
La pynlong ruh ka jingtohkit ha ka jaka ba shong ba sah kine ki lehnoh bad la ïoh ban kurup ïa ki tiar ki tar kiba kynthup ïa ki Mobile Phone, ki kot ki sla bad kiwei kiwei.
