Shillong, Nailar 17
Ka Voice of the People Party (VPP) ha ka 14 tarik mynta u bnai ka la phah da ka jingthoh sha u Myntri Rangbah ka jylla u Conrad K Sangma na ka bynta ban pynsted noh ha ka ban thaw ïa ka ‘Expert Committee’ ne ka komiti ki riewshemphang ban bishar bniah halor ka State Job Reservation Policy.
Ha ka shithi ba la pynher sha u Myntri Rangbah, u General Secretary ka VPP u Dr Ricky AJ Syngkon u la ong ba kum ka seng, ka kwah ban pynkynmaw ïa u Myntri Rangbah ba un shimkhia bad ban pynsted noh ïa ka kam kaba ïadei bad ka jingthaw ïa ka ‘Expert Committee’ ka ban khmih bad bishar bniah halor ka State Job Reservation Policy, kumba la dep ban kdew ha ka byrta ne ‘notification’ jong ka Sorkar ba la pynmih ha ka 1 tarik Jylliew, 2023.
Une u nongïalam ka VPP u la pynkynmaw ba ha ka jingïakynduh ba khatduh bad u Myntri Rangbah ha ka kamra treikam ka jong u, kata ha ka 13 tarik Naitung mynta u snem, la pyntip sha ka seng ba ka sorkar jylla ka la jan dep ha ka ban wanrah ïa ka jingpynbna kaba ïadei bad ka jingthaw ïa ka komiti bad kaba sah ka dei sa tang ban pyntip ïa ka kyrteng jong u ne ka Chairman jong ka komiti.
U Dr Ricky u la ong ba ha kaba ïadei bad kane, u Myntri Rangbah u la ai ktien bad kular ba ïa kane ka komiti yn sa lah ban pyntreikam noh tang ha ki ar lane lai taïew, hynrei mynta la ïaid shi bnai naduh kato ka sngi bad kumta ka VPP ka khmih lynti ba ka sorkar kan ïaid shakhmat bad ka jingkular ban thaw noh ïa ka komiti kloi katba lah.
