Shillong, Nailar 18
Ka ïingbishar ha ka Sngi Thohdieng ka la ai hukum ïa ki pulit ba kin tohkit 10 sngi ïa ki lai ngut ki dkhot ka National Liberation Council of Nongkyndong (NLCN) katba uwei pat u dkhot, uba la dei ban shah ïalam sha ïingbishar, u la kem pang noh bad la pynkit ïa u sha hospital.
Nalor kine ki lai ngut, ha ka Sngi Palei ka ïingbishar ka la hukum ba ïa ki san ngut kiwei pat ki dkhot ka NLCN, yn tohkit da ki pulit na ka bynta 8 sngi.
Haduh mynta, ki nongïalam bad ki dkhot ka NLCN kiba la shah kem ka la kot sha ka 11 ngut. Napdeng kine, uwei u dei u khynnah uba dang pule ha ka Klas X bad uba dei uta u khlieh duh lane u ‘Chairman’ ka kynhun. Ka la don ruh kawei ka kynthei kaba la shah kem ïa kaba la kynnoh ba ka dei kata ka nongpynrung dkhot bad nongbuh ïa ki jingthoh jingtar, bad kane ka don hapdeng ka jingshah sumar ha kawei na ki hospital.
Ha ka 16 tarik Nailar, ki pulit ki la sdang ban ïoh kem ïa ki nongïalam ka NLCN ba kynthup ïa u Chairman, Commander-in-Chief, ki Area Commander bad kiwei katba ha ka Sngi Palei ki la kem sa ïa lai ngut ba kynthup ïa u Area Commander ka East Khasi Hills.
Ha ka jingshisha, ki la don ki dkhot ka NLCN kiba la dei ban mih na kane ka jylla ha ka Sngi Palei ban leit sha Nagaland khnang ban ïoh jinghikai ha ka liang ki tiar siat. La ong ruh ba ka NLCN ka la dep ban ïakren bad ki katto katne ki seng lehnoh na Nagaland, bad ka la thmu ban thied ïa ki tiar siat bad ki kuli. Nalorkata, la ong ba ka NLCN ka la don jingthmu ban buh ïa ki ktem ai jinghikai jong ka ha khappud jong ka India bad Bangladesh.
