Shillong, Nailar:
Ka KSU Employment & Monitoring Cell ha ka Sngi Balang ka la ïakynduh ïa u Director General (DG) ka North East Centre for Technology Application and Reach (NECTAR) ban pynsngew halor ka jingujor na ka liang ka samla thep kam ha katei ka shlem treikam.
Katkum ka jingïoh lum khubor, la pynsngew sha ka Seng ba ka rukom thep kam ha katei ka shlem treikam kam long kaba ïaid beit bad bunsien ki ju ïoh ki briew ba nabar Jylla wat la ki Khasi ki la kot ïa ka kyrdan.
“Ka jingpynbna ba la pynmih ha ka 9 tarik u Kyllalyngkot, 2023 – bun tylli ki kam ki la mih na bynta ki kam bapher-bapher hynrei ka rukom thep kam ka long kaba jar-jar ba haduh ki nongthep kam kim ju ïoh jingtip eiei halor ka jingshah jied jong ki nongïoh kam,” la ong ka kyrwoh na ka seng.
Kumta na ka liang ka Seng ka la dawa ba ki kyrteng jong nongthep kam kumjuh kito ki ibit na bynta ka kam (‘Eligible Candidates’/ ‘Shortlisted Candidates’) bad kiba la shah jied, dei ban pynpaw sha ka pyrthei ha ka ‘website’ jong ka NECTAR, ryngkat ki ‘marks’ khnang ban ïohi katno ki ïoh ha ki eksamin bad ‘interview’ bad ba kan ym don kano-kano ka jingleh shiliang na ki bor pynïaid.
Shuh shuh ka seng ka dawa ba dei ban ai lad shwa ïa ki trai Jylla ban ïoh kam lada don kiba thep.
Na ka liang u DG u la pynshai ba ka jingthung kam ka dang ïaid bad kam pat dep bad ba kin sa buh noh ïa ka thup kyrteng (list) kumba dawa ka Seng ha ka ‘website’ jong ki bad ba kin ai lad shuwa ïa ki paid Khasi lada ki don ïa ka kyrdan kaba la biang.
