Shillong, Nailar 18
Ka Voice of the People Party (VPP) ha ka Sngi Thohdieng ka la dawa na u Myntri Rangbah, Conrad K Sangma, ban pynsangeh noh ïa ka jingïasoi kontrak bad ka M/S Rocky Dhar ha kaba ïadei bad ka rai ban aiti sha ka M/S Rocky Dhar ïa ka khrum jong ka ‘Commercial Complex’ kaba don ha Meghalaya House, Russell Street ha sor Kolkata.
Ha ka shithi sha u Conrad, u General Secretary ka VPP, u Dr Ricky Syngkon u la ong ba ka seng ka la sngewkyndit ban tip halor ka rai jong ka tnat General Administration Department (A) jong ka sorkar jylla ban aiti noh ïa ka khrum lane ‘Ground Floor’ jong katei ka ‘Commercial Complex’ sha ka M/S Rocky Dhar kaba don ha Nongmynsong, Umkdait.
U Dr Syngkon u la ong ba kumba ka long mynta, ïa katei ka khrum la pyndonkam da lai tylli ki shnat jong ka sorkar ba kynthup ïa ka Tourist Information Centre hapoh ka jingkhmih jong ka Directorate of Tourism, Directorate of Horticulture bad ka Government State Emporium kaba hap hapoh ka jingkhmih jong ka Meghalaya Handloom and Handicrafts Development Corporation Limited. Ka VPP ka la ong ruh ba la buh ïa kine ki shnat jong ka sorkar kum shi bynta ban pynïaid ïew bad pynpaw nam ïa ki tiar ki tar ba la pynmih na Meghalaya.
Namarkata ka VPP ka la ong ba kumno ka sorkar, kaba dei ban shakri ïa ki paidbah lyngba ki shnat jong ka, ka la shim ïa ka rai ban pynbiang ïa ka jingdonkam jong uwei u briew khlem da pyrkhat shuh ïa ka jingdonkam jong kiba bun ba lang. Ha ka jingshisha, ka VPP ka la ong ba ka sorkar ka don ïa ka jingkitkhlieh ban kyntiew ïa ka ïoh ka kot jong ki paidbah bad kumjuh ruh ïa ka kolshor jong ka jylla.
Shuh shuh u Dr Syngkon u la ong ba ha ka jingshisha, la khot ‘Tender’ na ka bynta kawei ka jaka kaba lait ha katei ka Commercial Complex, hynrei ym na ka bynta ka khrum lane ‘Ground Floor’. Hynrei, haba la ai pat ïa ka ‘Tender’, la ai na ka bynta ka khrum jong ka ‘Commercial Complex’ bad kane ka pyni ïa ka jingpynkheiñ ïa ki aiñ bad ki kyndon bad ka jingpulom jong ki bor ba dei khmih ban leh ïa ka kam kumba ka dei.
Ka VPP ka la ong ba ka pyrshah jur ïa katei ka rai ban aiti ïa ka khrum jong ka Commercial Complex sha ka M/S Rocky Dhar da kaba ktah ïa ki shnat treikam jong ka sorkar bad kumjuh ruh ïa ki nongthaiñ nongshna ïa ki tiar ki tar na kane ka jylla. Namarkata, ka VPP ka la dawa ïa u Conrad ba un tuklar halor kane bad ban pynsangeh noh ïa ka jingaiti ïa ka kontrak sha ka M/S Rocky Dhar na ka bynta ka jingbit jingbiang bad jingmyntoi jong ka jylla bad ki paidbah.
