Shillong, Nailar 18
Hadien ka jingïoh ujor na ki paidbah nongshong shnong jong ka thaiñ Mawhati halor ka jingdon ka jingkhlong maw beaiñ napoh ka Wah Umïam da ki briew jong ka Dhar Company, na ka liang ka Hynñiewtrep Achik National Movement (HANM) ha ka sngi Thohdieng ka la dawa ba katei ka kompani ka dei ban ai ïa ka jingpynshai halor kane ka jingkhlong maw beaiñ jong ka napoh katei ka wah.
Haba kren sha ki lad pathai khubor ha Shillong Press Club, u Bah Bawan Nongsiej, uba dei u Incharge jong ka HANM Ribhoi, u la ong ba na ka liang ka seng ka la dep ban phah da ka jingthoh sha ka ophis jong u Managing Director ka Dhar Company Construction Limited kaba don ha Shillong ban pan ïa ka jingpynshai halor kane ka jingkhlong maw napoh katei ka wah, hynrei na ka liang katei ka kompani ruh kam pat shym la jubab eiei satia halor kane.
U Bah Bawan u la ong ba kane ka jingkhlong maw pathar da ka Dhar Company ka long pyrshah bad ha kajuh ka por ka la pynsniewdur bad ka la pynjngut ïa ka wah kat haduh ba ka um na katei ka wah kam long shuh kaba bit ban pyndonkam ïa ka. Nalor kata, u la ong ba ym tang ba ka la pynsniewdur ïa katei ka wah, hynrei ka lah pynjot rathai ïa ka wah baroh shilynter ha kaba ki dohum dohpnat ki la ïap lut hapoh katei ka wah.
“Ka jingeh ka long ba ki nongshong shnong ha kito kiba la dep, ïa ka Wah Umïam ki ïoh ban pyndonkam ïa ka da kaba ki sum ki sait hynrei mynta pat ka la long khongpong”, la ong u Bah Bawan.
Shuh shuh u Bah Bawan u la buh jingkylli ïa katei ka kompani ba hato ka la ïoh jingbit ne em na ka tnad PWD, ka National Green Tribunal (NGT) bad na ki bor kiba kham halor ban khlong ïa ki maw napoh ka Wah Umïam ban shna surok hapoh Mawhati.
“Halor kane, na ka liang ka seng ka kwah ïa ka jingpynshai na kane ka Dhar Company ba ka la ïoh ne em ïa ka jingbit ban tih maw”, la ong u Bah Bawan
Namar kata, na ka liang ka seng ka la buh ïa ka jingpyrshah halor kane bad ka la dawa na katei ka kompani ba ka dei ban ai jingpynshai mardor nangno ka ïoh jingbit ba kan khlong ïa ki maw napoh ka wah Umïam. Lada katei ka kompani kam ai jingpynshai halor kane, ka seng kam banse ban hap mih paidbah ban leit ujor sha ki bor kiba kham halor.
