Jowai, Nailar 18
Palat shi hajar ngut ki Karbi na ki thaiñ Tahpat kiba dang hap ha ki jaka ïakajia khappud hapdeng ka Meghalaya bad Assam ha ka jingsynranlang ki dkhot ka Karbi Students’ Association ki la leit sha khappud jong ka shnong Lapangap kaba don ha West Jaiñtia Hills District ha ka Sngi Thohdieng ban pynjulor ïa ki tynrai dieng.
Katkum ka khubor ba la ïohlum na u Waheh Shnong ka Lapangap, u Bah Deimonmi Lyngdoh, la ong ba ki tynrai dieng kiba la shah pynjulor ki dei ba la thung da ka shnong Lapangap lyngba ka skhim na ka Meghalaya Basin ha ka jaka ba la tip kum ka Pynthor hapoh Lapangap.
Mar syn ïoh jingtip halor katei ka jingthmu jong ki Karbi, kumba 100 ngut ki nongshong shnong ka Lapangap ki la leit bran-bran sha katei ka jaka ban ïada ïa kitei ki tynrai tynrai, la ong u Waheh Shnong.
Ha ka jingpyrshang jong ki nong Lapangap ban ïada ïa ka jingshah pynjulor ki tynrai dieng ha kti ki nong Karbi, kita ki nongshong shnong ki la ngat pynban ha ka jingshah kawang maw ha ki nong Karbi, hynrei ym shym la don ba mynsaw, la ïathuh u Bah Deimonmi.
Shuh shuh u la ïathuh ba ka la don ruh ïa ka jingpyni dohksah markylliang hapdeng ki nong Karbi bad ki nong Lapangap, hynrei ïa kane la lah ban tem noh da ka jingdon ki pulit na Meghalaya bad Assam.
U Waheh Shnong u la ong ba ka jingïakynad kaba la khluit tar ka la kut noh ha kane ka sngi da ka jingmynjur markylliang ban pynneh ïa ka jinglong jingman kumba ka long tat haduh ban da pynbeit da kumwei da ki bor distrik na West Jaiñtia Hills bad West Karbi Anglong.
Ha katei ka jingjia, u Waheh Shnong u la ong ba mynta ka sngi, kumba 1,000 tylli ki tynrai dieng ki la shah pynjulor, bad hashwa kane, ka la don sa kawei pat ka jingshah pynjulor ki 800 tylli ki tynrai dieng kaba la jia ha ka 13 tarik Naitung.
