Shillong, Nailar 18
Kawei ka metïap jong uwei u briew bym lah ithuh satia la ïoh ban tam ha ka sngi Palei bad la shu antad ba utei u briew u dei uba dang don hapdeng ka 32-40 snem ka rta.
Ïa ka metïap jong utei u briew la lap ba ka la thiah lyngktar hajan ka madan ïalehkai kaba don ha Dhobi-Ghat Jhalupara ha ka por kumba 3 baje eiei noh phai sngi. La suba ruh ba ïa katei ka metïap la shu wan ban bret ha katei ka jaka.
Haba ïoh jingtip halor katei ka jingjia, na ka liang ka Crime Scene Unit (CSU), ka la leit sha katei ka jaka ban tohkit halor katei ka jingjia ha Police Outpost.
Katkum ka jingïoh jingtip, la ïathuh ba na ki jaiñphong jong utei u briew la ïoh ïa kawei ka Aadhar Card kaba don ka kyrteng jong u Arjun Thapa C/o Kuamr Thapa ba shong ba sah ha 4th Cross 8th Road St. Bed 4th Block Coramangala, Bangalore, South Bangalore, Karnataka, 560034.
Katkum ka jingpeit bniah ïa ka met jong utei u briew ha katei ka jaka ha ryngkat ka jingïadonlang jong ki nongshong shnong kiba sakhi, la lap ba ki la don shibun tylli ki dak mong ha ki bynta jong ka khlieh, ka durkhmat, ki kti, ka shyntur bad ha ka kjat kadiang.
Ïa katei ka metïap jong utei u briew la pynkit noh sha NEIGRIHMS na ka bynta ban leh ïa ka bynta kaba sah bad la buh ïa ka khnang ban wan kam da ki bahaïing bahasem bad ka jingtohkit halor katei ka jingshah pynïap la dep ban register bad ki pulit ki dang pynlong ïa ka jingtohkit ban lap ïa kiba donkti halor kane ka jingjia.
