Nongstoiñ, Nailar 18
Tang hadien khyndiat taïew ba la leit ba ka Khasi Students’ Union (KSU) Nongstoiñ Circle ka la pynlong ka jingkhynra ha ki bynta ka Ïew Nongstoiñ bad ban lap ruh ïa ki briew kiba donkti ha ki kam sniew bad kumjuh kiba dih bad khaïi drok sop-sop. Kumta ha ka Sngi Thohdieng haba ïai bteng ban pynlong ka jingkhynra, ka KSU ka la lap biang sa kawei ka ïing ha khlieh Ïew Nongstoiñ ïa kaba la suba ba la ju pyndonkam da ki nongdih bad nongkhaïi drok.
Ki nongkitkam ka KSU ki la ïathuh ba ka seng, hadien ba ki la lap ïa katei ka ïing, ka la khang tala noh, bad ka la maham ruh ïa baroh ki trai ïing ba kim dei ban ai wai ïa kum kine ki briew kiba pynjaboh ïa ka imlang sahlang.
Nalor nangta, ki la pynpaw ruh ba ha ki snem kiba la dep, na ka liang jong u Syiem Nongstoiñ u la dep ban pynmih ïa ka hukum ïa ki trai jaka kiba don ïing ne dukan hapoh ïew ba kim dei ban ai wai ïing hapoh ïew. Namarkata, ka KSU ka la maham jur ïa kino kino kiba ai wai ïing sah ha katei ka ïing.
Ka KSU ka la phah ruh ïa ka kyrwoh ban ïawer ïa baroh ki trai ïing bad ki shnong ki thaw ba ki dei ban peit bniah ha shwa ban ai wai ïa kino-kino ki briew bad ruh ki dei ban ai ïa ki kot ki sla kiba biang katkum ki aiñ shnong.
Shuh shuh ki nongkitkam ka KSU ki la ïathuh ruh katkum ka jingïathuh ka jong ki, ki nongdih bad khaïi drok ki la shim wai ïa katei ka ïing na u trai jong katei ka ïing. Kumta ka KSU ka la ong ba na ka bynta ka bha ka miat jong ka dong ka thaiñ, kan nang ïai peitngor bad lada ka KSU kan lap kan leh da kaba tyngeh.
