Shillong, Nailar:
U Myntri ka tnat Pynroi Sor, Bah Sniawbhalang Dhar u la kynthoh kylla halor ka jingong ba ka rukom pyntreikam ïa ki projek hapoh ka Smart City ha nongbah Shillong ka long kaba duna bha, bad u la ong ba ki projek baroh ki dei kiba dang pyntrei bad ïaid shakhmat, lait noh tang ka ‘Smart Road’ ka bym pat lah ban sdang.
Haba buh jingkylli halor ka rukom pyntreikam ïa ki projek smart city ha kaba ka Shillong ka la shah pynhap ha ka thup jong ki 10 tylli ki nongbah kiba khlem lah ban pyntreikam ïa ki projek, u Bah Dhar u la ong ba ki projek hapoh ka Smart City Mission ki dei kiba la ïaid shakhmat, naduh ka ïew ha Laitumkhrah, Polo, nalor ki jaka pynïeng kali bad nala.
“Lehse ka jingong ba ngim lah ban pyntreikam ka dei tang namarba khlem pat pyntrei ïa ka smart road. Kane ka projek ka kham suki khyndiat namarba donkam bun tylli ki tnat treikam ban donbynta lang haba pyntrei ïa ka smart road,” u la ong.
U la ong na ki 8 tylli ki projek smart city, bun na kine ki dei kiba la jan dep bad shen yn sa plie noh ïa ki.
Dang shen ka Ministry of Housing and Urban Affairs (MoHUA) ka la buh ïa ka nongbah Shillong ha ka thup ki 10 tylli ki nongbah ha India kiba khlem lah ban pyntrei ïa ki projek smart city bad khlem lah satia ban pyndep.
Kiwei pat ki nongbah kiba ngat lang ha ka thup bad ka Shillong ki long ka nongbah Guwahati, Imphal, Aizawl, Amaravati, Diu, Greater Warangal, Kavaratti, Puducherry bad Port Blair. Ka jingmang pisa ka long mar shiliang kata, 50 la 50 hapdeng ka Sorkar Pdeng bad ka Sorkar Jylla, bad ki projek smart city ha Meghalaya ki kot kumba T. 1,039 klur, bad la dep pyllait T.349 klur ha u Rymphang mynta u snem.
