New Delhi, Nailar 18
Ka jingthiang u sohtrun na Meghalaya ka la bna nam syndon sha kylleng ka ri India na nongbah Delhi lyngba ka tamasa sohtrun (pineapple festival) kaba la pynlong ha Dilli Haat, INA New Delhi ha kaba la wan ban plie da u Myntri ka Sorkar Pdeng u Giriraj Singh uba peit ïa ka tnat Pynroi Nongkyndong bad Panchayati Raj ha ryngkat ka jingdonlang u Myntri Rangbah Conrad K Sangma bad kiwei kiwei ki heh ki haiñ.
Nalor kane ka tamasa kaba la bna paidbah ha nongbah Delhi ban pynpaw nam ïa u sohtrun na Meghalaya, ka long ruh ka jingsarong ïa ka Jylla bad jingmyntoi ïa ki nongrep namar ïa u sohtrun na Meghalaya mynta la pynïaid ïew ruh sha kiwei ki ri ka pyrthei ha kaba la die ha ki dukan heh ha nongbah Dubai, Kuwait bad Sharjah.
Ka jingbna nam ïa u sohtrun na Meghalaya ba u dei uba thiang, ka la pynlong ruh ïa ki paidbah ban wan tuid ban thied na ki dukan ha Dilli Haat.
Ha kane ka sngi la donlang ka Myntri ka rep ka riang ka Kong Ampareen Lyngdoh, u Myntri ka tnat jngohkai pyrthei Bah Paul Lyngdoh, u Chief Secretary Bah DP Wahlang, u Commissioner & Secretary ka tnat ka rep ka riang, Dr. Vijay Kumar D, ka Secretary ka tnat ka rep ka riang Kong Isawanda Laloo.
Haba ai jingkren ha kane ka sngi, u Giriraj Singh u la ong ba u sohtrun na Meghalaya u la ïoh ka nam namar ka jingmad kaba bang bad thiang bha.
U la ong ba kane ka tamasa ka long ka lad ym tang ban pyni ïa une u soh ka Jylla Meghalaya sha ka pyrthei hynrei ban ïathuh ruh ïa ka jingtrei shitom bad aiti lut ki nongrep kiba ri ba sumar ïa ka khyndew bad ki jaka rep ha ka ri.
U la ong ba kumba 35 na ka 100 ki soh bun kiba shu sepei bad pyut ei khlem pyndonkam bha ban pynïaid ïew bad ai jingmyntoi ïa ki nongrep.
Kumta u la ïaroh ïa ka Meghalaya kaba la pynlong ïa kane ka tamasa kaba dei bad biang por eh ban kyntiew ïa ki nongrep soh lyngba ka jingïatreilang ban kyntiew ïa ka rukom rep bad ka ïoh ka kot ki nongrep.
Na ka liang u Myntri Rangbah, Conrad K Sangma u la ong ba kane ka tamasa kaba la pynlong khnang ha nongbah Delhi ka dei kaba kongsan ha ka jingïaid lynti ban pyni ïa ka lariti bad ka rep ka riang bad jingïatylli ka Jylla.
U la ong ba ka Meghalaya Pineapple Fest ka long kham palat ban ïa ka jingrakhe ba ka Jylla ka lah ban pynmih ïa ki mar rep, ba u sohtrun um dei tang u soh hynrei ka jingpynshisha ïa ka jingshisha ka khyndew, ka jingaiti lut ki nongrep.
U Conrad u la ong ba ka Jylla ka sngewsarong ban ïathuh ba da ka jingshim ka Sorkar Jylla ïa ki lad ki lynti ha ryngkat ka jingdonbynta lang, la lah ban shalan ïa u sohtrun shabar ri bad mynta ïa une u soh la die wat ha ki dukan heh kum ha Dubai, Kuwait bad Sharjah.
Kumta u la kyntu ïa baroh ban ïakmen lang ïa ka jinglong shitylli bad pdiang ïa ka lariti ha ryngkat ka jingthiang jong u sohtrun ban par ka jingthiang na nongbah Delhi.
U la ong ba ka jingthiang jong u sohtrun na Meghalaya ka long kaba palat ban ïa kiwei ki soh bad ïa u sohtrun la thung khlem da pyndonkam dawai.
U Myntri u la ai ka jingïaroh ïa ki kynhun kiba la lah ban pynurlong ïa kane ka tamasa bad ai khublei ruh ïa ka Sorkar Pdeng kaba la plie kat kane ka lad ban pyni sha ka pyrthei ïa u sohtrun na Meghalaya bad baroh kiba la wan ban ïashimbynta lang ban pynlong ïa kane ka tamasa kaba jop.
U la ïathuh ruh ba ban nang pynkhlaiñ ïa ka jingpynmih sohtrun la buh ruh ïa ka mobile processing unit ha Umdihar IVCS ha Ri Bhoi.
U la ong ba ka Jylla Meghalaya ka dang lah ban pynmih sohtrun kumba 1.5 lak metric ton shisnem bad u kyrmen ba ka Jylla kan nang lah ban pynmih shuh shuh kham bun.
Ka jingkhia u sohtrun na Meghalaya ka long hapdeng 600 gram bad 2 kilo bad ka dor ka long kumba T.16 haduh T.24 shi kilo kumba la shim da ki nongthied ha ka ri bad shabar ri.
Ha kane ka sngi la buh bun tylli ki dukan ban die bad pyni nam ïa ki tiar ki tar kiba shna bad thaiñ da ki briew ka Meghalaya, nalor ki jingdih kum ki umsoh ba shna hi na ki soh bapher bapher.
La pynshongshit shuh shuh ha kane ka sngi da ki sur jingtem bad jingrwai kiba kynthup ïa ka kynhun Colours, Reggae Group -The Grassroots, Da Thymmei, Banker Kharkongor.
