Shillong, Nailar 18
Ka jingkhlad u Bah Rishadsing Kharmutee, 37 snem ka rta na ka shnong Mawdiangdiang, ka la buh ha ka jingsahdum ïa ki bahaïing lem bad ki paralok parajor. Une u rangbah u la mih na ïing ban leit kit ïa u sying uba khia haduh ar mon ban leit die ha Ïewduh. Pynban kaba lyngngoh ka long wat kiba ju thied sying kim shym la ithuh ïa u.
Ha ka jingbuddien U Nongsaiñ Hima halor ka jingkhlad u Bah Rishadsing la ïoh ban leit kylli ïa ki katto kattne ki nongdie sying ha Ïewduh mynta ka sngi ka 18 tarik u Nailar 2023, hynrei ki la ïathuh ba ha ka jaka ba ki die ïa u sying, kim shym la ithuh dur ne kyrteng ïa une u rangbah namar kim ju ïohi ruh ba un wan sha ïew hynrei ki shu mutdur ba u ju wan sha ïew tengkhat ban die sying namar u dei u nongrep ym dei u nongkhaïi.
Katkum ka jingïoh jingtip jong ki nongshong die sying ki la ong ba une u rangbah u dei na ka shnong Nongthliew bad u shongkha pat ha Mawdiangdiang.
Ïa ka met u Bah Rishadsing la lap da kiba trei ha kawei ka jaka ha Them Bijoy na nala kaba la tuid ha ka por ba ther u slap ha ka 14 tarik mynta u bnai.
Kum ban shu pynkynmaw u Bah Rishadsing u la mih na ïing ha ka por 9 baje mynstep jong ka 11 tarik mynta ubnai ban leit die sying kumba 2 mon sha Ïewduh, hynrei naduh katei ka por ] um shym la wanphai ïing shuh.
Haba ki bahaïing ki la leit pyntip noh sha ki pulit ha ka 12 tarik jong ujuh bnai, ki pulit ki la lap ïa ka metïap ha ka janmiet jong ka 14 tarik mynta u bnai.
Hadien ba la dep post mortem ha Civil Hospital Shillong ki bahaïing hasem ki la leit ontep noh ha ka 15 tarik mynta u bnai na la shnong ba u sah ha Mawdiangdiang, New Shillong.
Wat la ki bahaïing ki la lap ïa ka metïap, hynrei kim kwah shuh ban buddien kumno utei rangbah u ïap namar ki la hun noh haba ki la lap ïa ka metïap.
