Shillong, Nailar:
Ka Mawsmai Nongthymmai Elaka ha ka 14 tarik mynta u bnai ka la pyllait paidbah ïa ka kot ba la thoh halor ka khana jong ka Elaka na ka Syiemship sha ka Sirdarship ban tip ba kumno ka Hima Mawsmai bad ka Hima kaba khraw bor tam ka leh ha ki por ba mynshwa.
Ïa kane ka kot la ai kyrteng ka Hima Mawsmai ba la pyllait paidbah da u Bah Titosstarwell Chyne, MDC ka Sohra ha ka jingdonlang ka Kong J.M. Umdor ka EAC Sohra Civil Sub-Division, u sordar, ki dkhot ka shnong, ki longkmie bad ki samla.
U nongthoh ïa kane ka kot u dei u Dr. Airpeace Rani.
Haba ai jingkren ha kane ka sngi u Bah Kenes Singh Khongwar uba dei u Sirdar u la ïathuh ba ïa kane ka kot ym shym la thoh tang shi sngi ar sngi hynrei kaba la ngam jylliew bha bad ka la shim por haduh 4 snem tam ban pyndep naduh ba la sdang.
Ka jingpoi ban thoh ïa kane ka kot ka dei hadien ba ka dorbar ka la ïaid na ka snem sha ka snem ka Elaka Mawsmai kam don ïa ka kot kum ka History ba kyrpang na ka bynta ka Elaka Mawsmai. Kumta ka sa poi ban ïa pyrkhat ban wad ïa u nongthoh u ban thoh ïa kane ka kot ban sah jingkynmaw.
Ha kane ka sngi ban pynphuh pynphieng ïa ka prokram la ïoh ka jingrwai na ki samla kynthei ka Mawsmai.
