Shillong, Nailar 18
Ka Meghalaya College Teachers’ Association (MCTA) ka la rai ban shim noh ïa ka klas ‘First Semester’ jong ka ‘Old Syllabus’ watla ka jingïakhih ‘Non-Cooperation Movement’ (NCM) kan dang bteng tat ynda pynbna da kumwei pat.
“Ngi la shong jingïalang hynnin ka sngi bad ngi la rai ban bteng ïa ka NCM tat haduh ban da pynbna da kumwei pat. Hynrei ngin sdang ban shim noh ïa ki klas ‘First Semester’ naduh mynta ka sngi tangba kam dei na bynta ka ‘New Syllabus’ hapoh ka National Education Policy (NEP), hynrei ka ‘Old Syllabus’,” la ong General Secretary ka MCTA, Dr. Airpeace Rani ha ka Sngi Thohdieng.
U la ong ruh ba ka seng kam ithuh ïa ka jingpyntreikam ïa ka NEP naba ka long kaba be-aiñ bad kaba la shu pyntian jubor, hynrei ka ithuh ïa ka ‘Old Syllabus’ namar ki samla pule ki pynrung klas lyngba kane (Old Syllabus).
“Ngi la phah jingbthah sha baroh ki shnat (unit) jong ngi ban sdang noh ïa ka ‘First Semester’ tangba ki klas kin ym don jingïadei eiei bad ka NEP,” ong u Dr. Rani.
Haba kdew ba ka jingpyntreikam ïa ka NEP kan jynjar shibun, u la ong ba ïa mynta ka jingsdang ïa ka ‘First Semester’ ka la slem lypa bad kumta kan bha shi kat dei lada ïaid noh shakhmat bad ka ‘Old Syllabus’ namar ka eksamin ruh kan sa long ha u bnai Naiwieng.
“Haba ïadei bad ka ‘Old Syllabus’, ki nonghikai ruh ki la sngewthuh lypa, hynrei lada shim ne bud ïa ka NEP kaba dang thymmai…kan buh jingeh khamtam namarba la slem lypa,” la ong u General Secretary.
Haba kylli la ka seng ka don jingthmu ne em ban ïakynduh ïa u Vice-Chancellor ka NEHU, utei u nongïalam u la ong ba ka seng ka la phah jingthoh sha u VC ha u bnai Naitung ban dawa weng ïa ka hukum halor ka ka jingpyntreikam ïa ka NEP, hynrei wat haduh mynta, u VC um pat jubab eiei halor katei ka shithi.
“Ka nongrim jong ngi ka long kaba shai – ban rah ïa kane ka mat ha ka Academic Council (AC). Dei ban khot ïa ka jingïalang ha ka lynti kaba dei katkum ki kyndon khnang ban ïatai ïa ki jingeh haba phai sha ka jingpyntreikam ïa ka NEP,” u la ong.
U Dr. Rani u la ban biang ba ka AC ka dei ban ïatai bniah, kumjuh ban ïakren halor ki jingktah jong ka NEP khamtam ka bai klas namar kan kynthup ïa ki sobjek bathymmai, nonghikai bathymmai, ka jinglong-jingman jong ki eksamin nalor kiwei-kiwei.
“Hashuwa ba ngin leit sha madan, ngi dei ban long kiba la khreh. Mynta shu ong ban sdang pyntreikam beit noh, katba ki kolej kim tip ba kan buh jingeh ïa ki nonghikai,” la ong u Dr. Rani.
Ka Meghalaya College Teachers’ Association (MCTA), ka seng ki nonghikai kolej ha ka Jylla ka la shim ïa ka rai ban ym ïatreilang shuh bad ka skulbah North Eastern Hill University (NEHU) ha ka jingpynjari ïa ka National Education Policy-2020 ha ki kolej.
Shuh shuh ka seng ka hukum ïa baroh ki dkhot jong ka ba kim dei ban shim ïa ki klas jong ka ‘First Semester’ ha baroh ki sobjek naduh ka 1 tarik Nailar, 2023. Ki dkhot kim dei ruh ban shim kano-kano ka kam haba ïadei bad ka jingpyntreikam ïa ka NEP tat haduh ban da pynbna da kumwei pat.
