Nongpoh, Nailar 18
Ka jingsdang sar jong ka jingpang at bad saw jong ki khmat kaba la tip ruh kum kata ka ‘Epidemic Conjunctivitis’ naduh ki hep ki barit haduh kiba la heh la san ruh kumjuh ha ka thaiñ Ri Bhoi ka la pynlong ïa ka tnad jong ka koit ka khiah ban shimkhia bad buh ka jingkyntu ïa ki paidbah ba ki dei ban shim ïa ki lad jingsumar ban ïada na kane ka jait jingpang kaba ïabit na iwei briew sha iwei pat.
Ka Dr TS Momin, District Medical & Health Officer jong ka Ri Bhoi District lem bad ka Dr. N Kharnaïor, Eye Specialist, haba kren sha ki lad pathai khubor ha ka Sngi Thohdieng ki la pyntip ba ki don shibun ngut ki paidbah kiba la shah ktah ha kane ka jingpang khmat ba kynthup naduh kiba la heh la san bad ruh kito kiba dang rit ka rta. Kumta ki la buh ka jingkyntu ïa ki paidbah kiba ngat ïa kane ka jingpang ba ki dei ban leit pyni mar-mar sha ki jaka ai jingsumar sorkar ban ïoh ïa ki dawai bad jingsumar kiba paka.
Kitei ki doktor ki la kyntu ruh ba ki paidbah kim dei ban shu leit thied hi ïa ki dawai na ki dukan khlem da khmih bniah shwa da ki doktor la ka dei ki dawai ba hap ban shu pynjaw lane kiba hap ban tah ruh kumjuh, hynrei ki dei ban pyni shwa ïa ki doktor khnang ba kan nym don kano-kano ka jingktah pat ïa ka khmat hadien habud.
