Shillong, Nailar 20
Ki nongkitkam kiba la trei shit rhem ha ka ilekshon MLA kaba dang shu dep shen ha u bnai Rymphang mynta u snem ki la sdang ban pynpaw ïalade ba ki kwah ban pan tiket ban ïakhun ïa ka ilekshon MDC ka ban long la shem snem.
Katkum ka khubor ba la ïoh ha kine ki sngi kiba thmu ban pan tiket na ka seng UDP ha Mawsynram constituency ki don haduh lai ngut. Kine ki dei ruh ki nongkyrshan kiba hakhmat jong u Bah Olan Suiñ uba la jop kum u MLA ka UDP na katei konstitwensi.
Nangta ki khubor ki ïathuh ruh ba napdeng kine lai ngut uwei u dei na ki thaiñ Lawbah, uwei na ki thaiñ Phlangwanbroi bad uwei na ki thaiñ Sawsymper, hynrei ïa ka kyrteng jong kine ki rangbah dang hap ban buhrieh shwa.
Haduh mynta kine baroh lai ngut ki la pynpaw ha ki para nongkitkam ba ki kwah ban ïakhun ïa ka ilekshon MDC lada ki ïoh tiket na ka seng UDP na Mawsynram konstitwensi.
Ki khubor na ki nongkitkam jong ka UDP Mawsynram Circle ki ïathuh ba kin dang bun ki nongkitkam kiba thmu ban pan tiket ynda la dei ka por ba ka jylli ka la khot ïa kiba kwah ïakhun ïa ka ilekshon MDC.
Ki la ïathuh ba ïa kane ka jingkhot ïa kiba kwah tiket yn sa leh ynda ka UDP State Election Committee ka la ai ka jingbthah.
Sa kawei ka khubor la ïathuh ba lada jia ba ki nongkitkam kiba la pynkhreh kim nud ban pan tiket ynda la bthah ka State Election Committee la sngewthuh ba u Bah Olan Suiñ un hap ban shim ïa ka rai ban ïakhun hi ïa ka ilekshon MDC.
Kum ban shu pynkynmaw u Bah Olan Suiñ u la jop ïa ka ilekshon MLA na Mawsynram konstitwensi da kaba pynliem ïa u Bah HM Shangpliang uba dei MLA barim uba ïakhun na ka seng BJP da 955 vote, katba u MDC ba mynta u Bah Alvin Sawkmie uba ïakhun na ka seng NPP u la wan balai.
Haduh mynta ki seng saiñ pyrthei kiba la pynkhreh shaid shaid ïa ka ilekshon MDC ha Mawsynram ki long u MDC ba mynta u Bah Alvin Sawkmie u ban ïakhun biang na ka NPP, ka UDP, ka VPP, katba kiwei ki dang ïa sngap jar jar.
