Shillong, Nailar 20
Ka Sorkar Jylla ka don hapdeng ka jingartatien ban pyndonkam ïa ki bos ilektrik kiba la mang da ka Sorkar Pdeng ban ai sha ki nongbah jong ki Jylla kiba la don palat lai lak ngut ka jingbun briew katkum ka khanasamari jong u snem 2011.
Kine ki bos ilektrik ki dei kiba la mynjur da ka Kynhun Myntri ka Sorkar Pdeng hapoh ka skhim “PM-eBus Sewa” ha kaba yn pyntreikam kumba 10,000 tylli ki e-buses lyngba ka PPP model.
Ïa kane ka skhim la mang kumba T.57,613 klur, ha kaba ka Sorkar Pdeng kan kyrshan T.20,000 klur bad kane ka skhim kan treikam kumba 10 snem.
Ka jingeh ïa ka nongbah Shillong ban pdiang ïa kine ki bos ilektrik ka dei namar ka jingkhapngiah bad ka dheng kali. Tang ki bos kiba la don lypa, ki la buh jingeh namar ka dheng kali kaba la nang jur man la ka sngi.
U Myntri ka tnat Pynroi Sor, Bah Sniawbhalang Dhar u la ong ba ka Sorkar Jylla kam pat shim rai bad donkam ban pyrkhat bha namarba ka don ka jingeh kaba mad namar ka jingkhapngiah.
U la ong ba ka Sorkar Pdeng ruh kam pat ai kano-kano ka jingpyntip sha ka Jylla haba ïadei bad kane ka skhim “PM-eBus Sewa”. Kane ka skhim kan kynthup lut ïa ki nongbah jong ki Jylla bad Union Territory kynthup ha North Eastern Region bad ki Jylla lum.
Yn kham phaikhmat nyngkong sha ki nongbah jong ki Jylla ki bym pat don kano-kano ka rukom pynïaid bos kaba biang.
Une u Myntri u la ong ba ka Sorkar Jylla ka shim ki lad ban pynduna ïa ka jingkhapngiah ha Shillong da kaba pyndonkam ïa ki jaka jong ki tnat treikam bapher bapher ka Sorkar na ka bynta ban pynkylluid da kaba pynbun ruh ïa ki jaka pynïeng kali, nalor ka jingpynkynriah ïa ki shlem treikam kynthup ïa ka Secretariat sha New Shillong Township.
