Shillong, Nailar:
Ki shnat treikam ki la don ha ka lynti jong ka jingkylla sha ka rukom treikam Digital, bad kata ka long ba ïa ki kam bad ki jingtip baroh ne data la kynriah bad buh ïa ki jingtip ha ka Cloud. Kum shi bynta ban pynbiang ïa kane ka jingdonkam, ka Vodafone Idea’s Vi Business ka la ïatehlok bad ka Yotta Data Services na ka bynta ban pyniar ïa ka jaka buh ïa ki Data bad kumjuh ruh ïa ka jingtreikam jong ka Cloud ne Cloud Services Portfolio. Ka jingthmu jong kane ka jingïatehlok ka long ba yn lah ban wanrah ka jingshngaiñ ha kane ka juk Digital, ban pynkhlaiñ ïa ka jingpynïasoh ne Connectivity bad ka jingdonkam ïa ka cloud.
Hapoh jong kane ka jingïatehlok, ka Vi Business kan pynkhlaiñ ïa ka jingtreikam jong ka ha kylleng ki ïew da ka jinglam khmat jong ka Yotta ha kaba ïadei bad ki Data Centre kiba paka, ka jingpynbha ïa kata ka jaka buh jingtip ka juk mynta ne ka Cloud, bad ka jingpynbha ïa ki lad bad ki rukom ai jingshakri khnang ba yn lah ban ïarap ha kane ka jingïaid lynti jong ka jingkylla sha ka Digital jong ki shnat treikam ka India. Ka Vi Business ka thmu ban pynskhem ka jingïatreilang bad ka Yotta na ka bynta ban wanrah ka jingpynïasoh kaba biang ne Connectivity, ka Cloud bad wanrah ruh ïa ka jingshngaiñ sha ki nongpyndonkam.
Haba kren shaphang kane ka jingïatehlok, U Rochak Kapur, Executive Vice President -Connectivity, Security, Cloud & Business Operations, Vi u ong, “Da kaba wanrah ïa kane ka jingïatehlok, ka jingthmu ka long ban pynkup bor ïa kine ki shnat treikam da ki lad bad kyndon treikam kiba ïahap bad ka kam bad ha ka dor kaba duna khang ba yn lah ban pyndap ïa ki jingdonkam ba kyrpang bad nang lah ban kyntiew shuh shuh ïa ki ha ka jingïaid lynti ha ka jingtreikam Digital.”
