Srinagar, Nailar 20 (UNI)
U nongïalam ka seng Congress, u Rahul Gandhi, ha ka Sngi U Blei u la kam ba ka China ka la dakhol ïa ki jaka ba don phlang ban bam ki jingri ha Ladakh.
Haba kren sha ki lad pathai khubor ha Ladakh, u la ong ba ki nongshong shnong ka Ladakh ki la ïathuh ba ka China ka la rung sha u pud u sam jong ka India bad ka la dakhol ïa ki jaka ba don phlang ban bam ki jingri.
U Rahul u la poi sha Ladakh ha ka Sngi Saitjaiñ ban leit jngoh ar sngi hashwa jong ka ilekshon sha ka Ladakh Autonomous Hill Development Council-Kargil (LAHDC-Kargil).
Utei u MP ka Congress u la ong ba ki nong Ladakh kim lah shuh ban leit sha ki jaka ba don phlang ban ïalam ïa ki jingri jong ki namar ïa kita ki jaka la dep ban dakhol da ka China.
“Ki briew hangne ki la kren shai ba ki shipai China ki la rung sha ka jaka jong ki bad ki la dakhol ïa ki jaka ba don phlang ban bam ki jingri. Hynrei u Myntri Rangbahduh ka Ri u la ong ba wat tang shi inshi ka jaka ruh ka khlem shah dakhol. Tangba kane ka dei ka bym don ïa ka jingshisha. Phi lah ban kylli na ki briew kiba sah hangne,” la ong u Rahul.
“Ki la don shibun ki jingud jingnam na ki nongshong shnong ka Ladakh. Kim hun satia namar ki kwah ban ïoh lad ban don ki nongmihkhmat na ka bynta jong ki. Nalorkata, ka don ruh ka jingbym don kam don jam,” u la bynrap.
Shuh shuh u la ong ba ki paidbah ki la pynsngew ba ïa ka sorkar ym dei ban pynïaid da ki babu sorkar, hynrei da ka sur jong ki nongshong shnong.
U la ïathuh ba u khlem ïoh lad ban leit sha Ladakh ha ka por ba u la pynlong ïa ka jingïaid kjat lane ka ‘Bharat Jodo Yatra’ na ki daw ki bym lah ban kiar, bad namarkata, u la wan jngoh ïa ka Ladakh ban sngap ïa ka sur jong ki paidbah. U Rahul u la ong ba u la leit sha Pangong bad Nobra Valley, bad kumjuh ruh sha Kargil ban sngap kaei kaba ki paidbah ki don ban ong.
