Shillong, Nailar 20
U heh pulit barim ka Jylla bad nongaiktien ka Bharatiya Janata Party (BJP), Bah Mariahom Kharkrang u la kdew ba ka jingkyrduh kam, ka jingpep skul shiteng por bad ka jingieid jaidbynriew ki long katto-katne ki daw kiba pynlong ïa ki khun samla ban rung sha ki kam lehnoh.
“Kam dei 30-40 snem mynshuwa ha kaba man ki Jylla (Thaiñ Shatei Lam Mihngi) ki dang sdang mih kine ki kam lehnoh. Ngi la ïohi mynta la 20-30 snem ba kam poi shano-shano. Wat ki seng kiba khlaiñ bha ruh, ki la sdang jah, sdang duh,” la ong u Bah Kharkrang ha ka Sngi Saitjaiñ.
Haba kdew ïa katto-katne ki daw kiba ïalam sha ka jingmih jong ki seng lehnoh, u la ong ba kawei na ki daw ka lah ban dei namar ka jingbym ïoh kam ïoh jam jong ki samla.
“Ki ïohi ba kito kiba rung sha ki seng lehnoh ynda la 10-15 snem, ka plie ka lad ka lynti bad teng-teng kum ki samla ki sngew ba ‘ngi ïaid ha ka lynti ba dei, ngim ïoh kam ïoh jam bad lashai hadien habud ngi seng da ka kynhun lehnoh’ bad hadien kumba 10-15 snem, ka plie ka lad ka lynti lyngba ka Sorkar…te ngin hap khmih bniah ïa kine,” u la ong.
U la pynshai ruh ba lada ka jingthmu jong ki seng lehnoh ka long tang ban dawa pisa, ka mut ka la shu kut la ka kut noh kumto, hynrei lada don pat da ka jingthmu kaba kham jngai, kata ka donkam ïa ka Sorkar Jylla kumjuh ka tnad pulit ban wad bad tohkit bniah kaei kaba pynlong ïa ki samla ban seng ïa ki kynhun lehnoh.
Haba pynkynmaw ïa ki por ba u dang shakri ha ka tnad pulit ka Jylla, u la ong “Haba ïadei bad kiba dang kham khynnah ka rta, dang kham lung ka jingmut-jingpyrkhat – kato ka shu long ba kim pat sngewthuh-sngewthaw bad ki shu sngew ba tangba la rung hangto ka don ka jingsngew khaiñ, jingsngew rangbah khlem da tip pat ba ki shah pyndonkam ha kiba la kham rangbah.”
Haba pynsngew ba ka jingpep skul shiteng por ruh ka long kawei na ki daw kaba pynlong ïa ki samla ban rung sha ki seng lehnoh, u Bah Kharkrang u la ong, “Ym dei ba kim lah ki kmie ki kpa, hynrei kim (khynnah samla) mon shuh ban leit pule bad kim don jaka ban leit. Ki shu shang makia shane-shatai, kine ruh ki ngop ha kine ki jait kam.”
U la pynsngew ba sa kawei na ki daw halor katei ka bynta ka long ba ki don ka jingthmu haba ïadei bad ka jingieid jaidbynriew bad ki sngew ba lada ki rung sha kine ki kynhun, ki lah ban leh eiei na bynta ka jaidbynriew bad haba ym don ha kano-kano ka kynhun, ym lah ban leh eiei, nalor kiwei-kiwei ki daw.
Halor ka jingmih jong ka kynhun National Liberation Council of Nongkyndong, utei u heh pulit barim ka Jylla u la ong, “Nyngkong eh, nga dei ban ai jingïaroh ïa ka tnad pulit ka Jylla kaba la lah ban tem ïa kane ha shuwa ban poi sha jngai bad lyngba ka jingtrei shitom jong ki, ngi khmih lynti ba kin lah ban pynduh ïa ki.”
U la ong ba ka tnad pulit kumjuh ka Sorkar Jylla ka donkam ban wad bniah na kito kiba shah kem kaei ka daw kaba pynlong ïa ki ban seng ïa ki kynhun lehnoh.
Shuh shuh u la bynrap, “Kawei eh ka lah ban dei na ka pule-puthi, namar ka pule-puthi kam biang ha nongkyndong…u sngew ba u shah kyntait, lait noh kito kiba don pisa, ki la phah noh sha sor. Hynrei uto u bym don lad don lynti, u kut ha nongkyndong bad ym i don lad don lynti haei-haei ruh…ka jingroi jong ki nongkyndong ha sor ruh ka pynpaw ba ha nongkyndong ym don eiei, ym don lad don lynti.”
Kumta kane ka pynlong ïa ki khynnah samla ban duh jingkyrmen halor kiei-kiei baroh bad na kata ka daw ka Sorkar bad ka tnad pulit ki dei ban tohkit bha na ki halor kane ka liang, ong u Bah Kharkrang.
