Khliehriat, Nailar 20
Ka District Horticulture Officer, East Jaiñtia Hills District kala pynlong ïa ka Exhibition Cum Workshop on Horticulture and Honey Bee ha ka 18 tarik mynta u bnai ha Khliehriat West Community Hall ha kaba u Myntri ka tnat Excise, Home (Passport), Revenue bad Disaster Management, u Bah Kyrmen Shylla u la ïadon lang kum u kongsan.
U Bah Kyrmen Shylla ha ka jingkren u la ong, ka rep ka riang ka dei ka kam kaba pynim ïa ki paidbah ka District bad u la kyntu ïa ki nongshong shnong ka District ban sdang noh ïa ka rep ka riang bad kyntu ruh ïa ki nongrep ban rep khambun khnang ba kin ïoh nong.
U la kyntu jur ban kiar na kaba pom pathar ïa ki dieng ki siej kiba ïada ïa ki sawdong sawkun ka mei mariang. U la pynshlur ruh ïa ki nongrep ban wad ki lad jingïarap na ki tnat sorkar.
Ha katei ka sngi la ïoh ruh ka jingkren na ka Kong D Sohtun, Director of Horticulture, Department of Agriculture and Famer’s Welfare, u Bah DB Dhar, District Horticulture Officer, ka Kong K Lamare, Executive Engineer, Water Resource, Dr. D Pasweth, Senior Scientist, Krishi Vigyan Kendra (KVK), Jaiñtia Hills bad u Bah M. Slong, Asst. Director of Agriculture.
Hadien ka jingïalang, u Myntri u la leit jngoh ïa ki dukan mar rep ba la buh da ka tnat District Animal Husbandry & Veterinary Officer, ka KVK, Jaiñtia Hills bad Mynkre Farm bad la sam ruh ïa ki khusnam sha ki nongjop ha ka Exhibition.
Ha ka sien shong kaba ar la pynlong ïa ka jingai jinghikai ïa ki nongrep bad ïa ki jingpynshai la batai da ki ophisar na ka Krishi Vigyan Kendra (KVK) bad ki Bank ha kaba ïadei bad ka ram Kisan Credit Card (KCC).
