Nongstoiñ, Nailar 20
Ar ngut ki suba nongkhaïi drok kiba ju donkti ruh ban pynïaid be-aiñ ïa u drok hapoh Nongstoiñ, ki la shah kem noh ha ki pulit ka Anti Narcotic Task Force (ANTF) ha ka Sngi Saitjaiñ.
Kitei arngut kiba la shah kem ki dei kiba la tip kyrteng kum u Hubert Lamphrang Paliar bad u Banraplang Sohlang.
U Superintendent of Police ka West Khasi Hills u la ong ba hadien ba la ïoh ïa ka jingtip ba thikna halor ka jingdon ki nongkhaïi drok hapoh sor Nongstoiñ, ki pulit ki la pynlong ïa ka jingkhynra bad ha ka janmiet jong ka Sngi Saitjaiñ ki la ïoh ban bat noh ïa kitei ar ngut katba ki dang thmu ban die be-aiñ ïa u drok hapoh ïew Nongstoiñ.
Shuh shuh u SP u la ong ba na ka met jong kitei ar ngut, la ïoh ban kurup haduh 3 gram u drok, kata 2 gram na u Hubert Lamphrang Paliar, bad 1 gram na u Banraplang Sohlang.
U SP u la ïathuh ruh ba hadien ba la leh ïa ka jingpeit bniah hapoh katei hi ka jaka ba la kem ïa ki arngut, ki pulit ki la lap ba utei u drok u dei u Heroin.
Shuh shuh la ong ruh ba ki pulit ki la ïoh ban kurup ïa kawei ka Mobile Phone bad ka pisa T. 5,620/-.
Hadien kane na ka liang ki pulit ki la pynrung da ka jingujor pyrshah ïa kitei ar ngut bad la pynngat ruh ïa ki ha ka kyndon ka NDPS Act.
