Shillong, Nailar:
Ka Tide India ka la pyllait paidbah ïa ki rukom treikam na ka bynta ki SME ne ki kam khaïi pateng kiba rit bad kiba pdeng ha Meghalaya ban ïarap ïa ki kumno ban pynïaid ïa ka kam, ban pynbha pura ïa ka rukom pynbiang ïa ki jingthoh jingtar ne ki Invoice, ban pynduna ïa ka jinglut bad ban nang kham pynbiang shuh shuh ïa ka jingïaid beit jong ka jaka treikam jong ki.
Kane ka rynsan ka pynpaw ba kumba 50% na ki SME ha Meghalaya ki ïakynduh ïa shibun ki jingeh ha ka liang ban pynbiang ïa ki kot ki sla bad pynbiang ïa ki jingkheiñ jingdiah, wat lada ki la don makna ki lad ki lynti bad ki briew ba tbit ha ka liang ki teknologi. Lyngba kane ka jingwad bniah la shem ba kumba 54% na ki SME ha ka jylla ki la ïasnohkti lang ban pdiang ïa kane ka rynsan, kiba kynthup naduh ki shnat kiba ai jingshakri ha ka jingpynïaid ïa ka pisa pilaiñ, ki shnat kiba peit ïa ka jingpynïaid ïew, ki Restaurant, ki dukan die marbam bad kiwei kiwei ki trai dukan. Ki SME ha Meghalaya ki dang donkam shuh shuh ïa ki briew bad ki kynthup kiba la shah hikai pyntbit bha bad kiba trei shitom ha ka liang ka IT na ka bynta ban trei ïa kine ki kam.
Kane ka rynsan kan ïarap ïa ki SME da kaba ailad ïa ki ba ki lah ban phah ïa la ka jong ka jingthoh kaba ïadei bad ka GST sha ki nongthied da kaba pyndonkam tang da ka Mobile, bad kumjuh ruh ba tip mano ba la siew bad mano ba dang pynsah ïa ka jingsiew. Kane kan ïarap ban weng ïa ka jingslem por, kan ïarap ban pyntyllun ïa ka pisa, ban pynbeit ïa ka jingkheiñ jingdiah, ban lah ban buh beit buh ryntih katkum ka jingkhein ïa ki tiar ki tar, bad pynsuk ruh ha ka rukom buh jingthoh ïa ka jingsiew ïa ki khajna.
U Gurjodhpal Singh, CEO, jong ka Tide India u ong “Ka jingpyntreikam ïa ka Invoicing Solution jong ki ka la ïarap ïa ngi shi bynta na ka bynta ban poi sha kane ka phang bad ka ïarap ruh ïa ngi ban pynbeit ïa ka jingtreikam jong ki SME, bad ka lah ban weng ïa ka jinghap ban pyndonkam ïa ki bun kiei kiei ban pynïaid ïa ki kam ki jam.”
