Jowai, Nailar 20
Ka Wahïajer Narpuh Social & Sport Club (WNS&SC) ryngkat ki nongshong shnong ka Wahïajer Narpuh, ki pyrshah jur ïa ka jingpynsngew paidbah ka ban sa pynlong da ka M/S Meghalaya Cement LTD ha ka 24 tarik Nailar ïa kaba la ai NOC da u Rangbah Shnong ka Wahïajer Narpuh, u Bah Sibren Sumer khlem da ïoh jingmynjur ne rai jong ka Dorbar Shnong.
Ki nongïalam kane ka ‘Sport Club’ ryngkat ki nongshong shnong ki khot kyrpad ruh ïa ki Seng bhalang, ki para shnong, para marjan shnong bad kino-kino ki bym sngew ïahap ïa katei ka jingpynsngew paidbah ka ban sa pynlong da ka M/S Meghalaya Cement LTD ha ka 24 tarik Nailar, 2023 na bynta ban pynheh ïa ka Cement & Clinkerization Plant na ka 2600 Tpd (0.858 Mtpa) sha ka 4500 Tpd (1.485 Mtpa) bad ka 10 Mw Cpp & 9.5 Mw Whrs.
Katkum ka jingïathuh ki nongïalam ka Sport Club, ka daw ba ki pyrshah ka long ba ka la jan palat na ka shnong jong ki, kaba kot tang kumba 500 mitar eiei.
Sa kiwei ruh ki ong ba ki nongshong shnong ki la mad shibun ki jingeh na ka jingwan jong ki karkhana pynmih dewbilat – ka jingshah ktah ka umbam-umdih, ki wah ki them haduh bym long shuh ban dih ïa ka um.
Ki la ong ba ka lyer ba la pynmih na kitei ki karkhana ruh ka long kaba sniew bad ka ktah ha ka ban ring mynsiem khamtam ïa ki khynnah-khyllung.
“Ki ïoh ruh ïa ki jingpang ba bun jait, kum ki ‘Chronic Bronchitis’, ‘Asthma’, ‘Emphysema’, bampong ha ki tor , ‘Pneumonia’, ‘Tuberculosis’, jingbym lait ring mynsiem, jyrhoh, jingpang shadem, jingpang sniehdoh bad kiwei-kiwei,” la ong ka kyrwoh na ki nongïalam.
Shuh shuh ki la bynrap ba ka mariang ruh ka la sinew lut naba jur than u pum-pum ba wan mih na ka karkhana bad kaba la ktah shi kat dei ïa ka rep ka riang, ki dieng bad ki soh ba ki ju ïoh mynta ki duh lut baroh.
Namar kitei ki daw, u Lami Mukhim, President bad u Cheerfull Surong, General Secretary ka Wahïajer Narpuh Social & Sport Club ki la pyntip sha baroh ki bym sngew ïahap ïa katei ka jingpynsngew bad ban ïa wan kyrshan lang ïa ki ha katei ka sngi.
