Tura, Nailar 20
Ka surok ba dang shu dep shna thymmai hapdeng ka Garobadha (South West Garo Hills) bad Selsella (West Garo Hills) ka la sdang ban tlor noh tang hadien kumba 3 bnai ba la dep shna ïa ka – ïa kaba ka tnad PWD ka kam ba dei ki trok kiba kit palat pud kiba ïaid lyngba kiba pynjulor ïa ka surok.
Ïa katei ka projek la shimti da ka Badri Rai & Company bad ka hap hapoh Ampati PWD Division.
Wat la ka surok ka long kaba paka tang katto-katne taïew mynshuwa, mynta ka la sdang ban tlor tang hapoh kumba 90 sngi namar ka jingwan ïaid jong ki trok kit jingkit ïa kaba ka surok kam lah ban shah.
Ka surok hapdeng ka Garobadha lyngba ka Selsella sha Rajabala ka long kawei napdeng kiba sniew tam hapoh ka Jylla. Ka la don ka jingmaramot (ba shi por) na ka por sha ka por, hynrei shisien ba wan u slap, ka surok ka la nang sniew arshah.
Ka jinglong-jingman ka la long haduh katta-katta ba ynda ïaid ïa ka jingjngai kaba 30 km hapdeng ka Garobadha sha Rajabala, ka shim por jan kumba shi kynta shiteng ban poi.
Hashuwa, ki nongshong shnong ka thaiñ ki la pdiang sngewbha ïa ka jingpynbna ban pynbha ïa ka jingjrong kaba 15 km wat la ka bynta ka bym pat pyntrei ka dang buh jingeh bad ka shim por kumba 45 minit ban jam sha shiliang.
“Ym pat don hi ruh 3 bnai bad ka surok ka la sdang ban or-pait. Ngi sngewkmen hashuwa haba la lah ban pyndep ïa ka, hynrei mynta ngim pat long kiba tikna. Kiba bun ki bynta ki la julor bad kaba sah ruh kan sa leit noh shen lada ym lah ban pyrkhat eiei halor kane,” pynpaw u nongshong shnong ka Selsella.
Ha kawei ka liang, haba la pyrshang kynjoh ktien, ki ophisar ka tnad PWD na Ampati ki la ong ba ka jingjulor ka dei namar ka jingïaid ki trok ba kit maw palat pud wat la ki la maham ba kim dei ban pyndonkam satia ïa ka surok.
“Haba phi peit ïa ka ‘Transit Pass’ jong ka tnad khlaw, ka kdew shai ba tang 9 MT ka jingkhia jong ka jingkit. Ha ka jingshisha, kine ki trok ki kit 35-40 MT bad kane ka la sdang pynjulor ïa ka surok. Namar ka jingbym don ka khyrdop ban thew ban woh ha kane ka lynti, ka long kaba laitluid ïa baroh na kane ka surok. Kine ki trok ki la pyndonkam lut ïa ki surok ban kit ïa ki maw na bynta ban shalan sha Bangladesh,” la ong uwei u heh ophisar ka tnad PWD na Ampati.
Ïa mynta, ka jingmaramot ka la sdang ha kito ki bynta kiba la julor.
