Shillong, Nailar 20
U Bah Kiki Garod uba dei u Director jong ki phlim Khasi u la ong ban wanrah ïa ki kam ak phlim kum ka karkhana ai-kam ai-jam ïa ki samla hapoh ka jylla, ka long satang lada ka sorkar ka ïarap ban shna hall ha man ki district namar haduh mynta ki nongshna phlim kim lah ban ïeng ha la ki jong ki kjat namar ka jingbun palat ki khajna bad ka jingshim bun palat ka bhah na u trai Bijou Cinema.
Kumta u la ong lada ka sorkar ka ïarap ban shna hall, ka jingpynmih ïa ki phlim ka kham bun namar ka jingïoh ka bun hynrei mynta ka jingduhnong ka dei beit ïa ki trai pynmih phlim namar hadien ba la dep ot ka GST bad TDS kumba 20 percent, hap ïasam bad u trai Bijou Cinema kumba mar shiteng ha ka taïew ba ar, taïew balai haduh taïew basaw.
U Bah Garod u la ïathuh ba ka phlim thymmai jong u ka ban sa mih noh shen ha Bijou Cinema ka dei ka ‘Johkhe.com’. Kane ka phlim ïa mynta ka dang ap pali ha Bijou Cinema hadien ba la dep ïoh syrnot na CBFC Guwahati.
U la ïathuh ba ïa kane ka phlim la ringdur mynshem snem (2022) bad mynta la ïoh ban pyndep kloi hynrei ka shong sa ka jingai por u trai Bijou Cinema.
Nalor kata, u la ïathuh ba u la sdang ban shna phlim nyngkong kiba la mih ruh ha cinema ki long kum ka Pyngngop, ka 9-Lad, Jingim, Ka Daw bad ka Johkhe ka ban sa mih noh shen.
Shuh shuh u la pynshai ba ka kam shna phlim kam dei ka kamkai kumba don kiba kren beiñ hynrei ka dei ka kam shisha namar ki khun samla ki ïoh la ka bainong bad ka dei ruh ka sap kaba u briew u wan sha kane ka pyrthei.
Namar kata, u don jingkyrmen ba shisien ka sngi ki phlim Khasi kin sa ïaid baroh kawei ka ri India bad sha kiwei ki ri namar mynta baroh ki phlim Khasi ki hap ban leit beit da ka digital ban shna ha Mumbai.
Nangta shuh shuh, u la ong ba katkum ka juk hap ïaid beit kumba ki phlim bollywood bad hollywood ki la leh. Pynban u don jingkyrmen kumba ki phlim South India ki kiew ha pyrthei baroh kawei, ki phlim Khasi ruh kin sa kiew lang lada ïoh jingkyrshan shwa na jylla lajong.
Haba ïadei bad ka phlim Johkhe, u la batai ba ka don ka khana ïa kawei ka ïing ha kaba u don uba kyllut, uba matlah bad u bym lait kren bad kane ka la pynkulmar thlim.
U la pyntip ïa kane ka phlim la ak da ki nongak phlim kiba la slem ha rilum Jaiñtia kum u Marboon Laloo & Dao Toi, Bah R.Conel Phira bad ki ar ngut ki puron ba dang thymmai ka Rimika Dkhar bad Rishwa Suchiang.
