Nongpoh, Nailar 21
Ka National Commission for Women (NCW) ka la ai jingmut ban phah tohkit ha ka Central Bureau of Investigation (CBI) halor ka jingkhlad noh ka samla pule kaba dei na Ri-Bhoi ha jylla Rajasthan.
Kum ban shu pynkynmaw biang, ka samla Walinda Binong, kaba pule ha ka skulbah Mody University, School of Design kaba don ha Lakshmangarh ha Sikar distrik jong ka Rajasthan, ka la khlad kyndit ha ka 27 tarik Ïaïong, 2023, ha ka ‘hostel’ kaba ka sah.
Na ka liang ki bor katei ka skulbah ki la kynnoh ba katei ka samla ka pynïap hi ïalade da kaba phasi. Hynrei na ka liang ki bahaïing hasem kim ngeit satia ïa katei ka jingkam jong katei ka skulbah ha kaba ki la dawa ba ka sorkar ka dei ban phah tohkit ha ka CBI ban lap ïa ki jingshisha baroh.
Ka dkhot ka NCW na kane ka jylla, ka Kong Delina Khongdup, ka la shimkhia halor katei ka jingkhlad ka samla, bad ha ka Lah Sngi U Blei ka la ïathuh ba ka NCW ka la ai jingmut sha ka Sorkar Pdeng ba kan aiti sha ka CBI ban tohkit halor ka jingkhlad jong ka samla Walinda.
Haba ïoh ban ïakren bad ka Kong Delina, ka la ïathuh ba ka dei ka jingshisha ba ka NCW ka la dep phah da ka jingthoh sha ka Sorkar Pdeng ban aiti sha ka CBI ban tohkit halor ka jingkhlad jong ka samla Walinda khnang ba ki bahaïing hasem kin ïoh ïa ka jingbishar kaba hok.
Haba pyrshang ban wad jingtip la ka Sorkar Pdeng ka la pdiang ne em ïa katei ka jingai jingmut jong ka NCW ban phah tohkit ha ka CBI, na ka liang ka Kong Delina ka la ïathuh ba kumba long haduh mynta, kim pat ïoh satia ïa ka jubab na ka Sorkar Pdeng. Hynrei kum kawei na ki dkhot ka NCW kaba peit kyrpang ïa ka khia ka shon bad ka jingeh jong ki kynthei, kan shimkhia ban ïai buddien halor katei ka bynta bad kyrmen skhem ba shen kan sa urlong.
Ka Kong Delina ka la ïathuh ruh ba wat lada na ka liang ka NCW kam don satia ïa ka bor ban hukum ïa ka Sorkar Pdeng ba kan pynlong ïa ka jingtohkit CBI, hynrei kan ïai pyrshang katlah katïai ba kane ka kam kan urlong bad pyntip ruh ba ki bahaïing hasem ki don ïa ka hok nongkynti ba kin dawa ïa ka jingtohkit CBI na ka bynta ban ïoh ïa ka jingbishar kaba hok.
Shuh shuh ka Kong Delina ka la ïathuh ruh ba ki bahaïing hasem ki la dep ruh ban thoh da ka shithi sha u Myntri Rangbah bad u Myntri ka tnat pohïing ka jylla nalor u Myntri Rangbahduh bad u Myntri Korbar Ri jong ka Ri bad ruh sha ka National Commission for Scheduled Tribes (NSCT) ban pynpaw ba kim hun satia ïa ka kaiphod tohkit jong ki bor pulit ka jylla Rajasthan. Ha kajuh ka por, ki bahaïing hasem ki la dawa na ka sorkar ba kan aiti ïa ka jingtohkit sha ka CBI ban ïoh ïa ka jingbishar kaba hok.
Na ka liang ka Kong Delina ka la kyntu ruh ïa ki bahaïing hasem ba kim dei ban sangeh ban wad ïa ka jingbishar kaba hok, hynrei ban ïakhun beit tat haduh ba kin ïoh ïa ka hok. Kumta na ka liang ka jong ka ruh kan ïai don ban btin lynti bad ïarap ïa ki ha kano-kano ka jingeh kaba ki ïakynduh.
