Nongstoiñ, Nailar 21
Ki bor pynïaid distrik jong ka West Khasi Hills ka la lum ïa ka jingïalang jong 53 tylli ki shnong ha khappud kiba don ha Langpih Sector ban ïakren bad ïatai halor ka jinglong jingman ki shnong ki thaw halor u pud u sam hashwa ba ka jingïapynbeit pud jong ka bynta kaba ar ha katei ka thaiñ kan sdang.
Ïa katei ka jingïalang la pynlong ha shlem treikam u Deputy Commissioner bad la pynïaid da u Additional Deputy Commissioner, u Bah HK Thabah, ha ryngkat ka jingïadonlang u Pa’iem Phlowel Syiem, Syiem ka Hima Nongmynsaw, ki nongïalam shnong jong ki 53 shnong katei ka thaiñ, u Bah J. Marweiñ, Additional Director of Land Survey Meghalaya bad kiwei kiwei.
U Bah Serbilin Lyngdoh, Executive Secretary ka Hima Nongmynsaw Syiemship, haba kren sha ki nongthoh khubor u la ïathuh ba katei ka jingïalang ka long na ka bynta ban peit thuh bad ban pynthikna bha ïa ki jaka ki puta ha kitei ki shnong khappud.
Shuh shuh u la ïathuh ruh ba ha katei ka jingïalang la ïakren ruh halor ki kam pynroi kiba la ïoh lyngba ka sorkar jylla Meghalaya.
U la ong ruh ba kane ka jingpeit thuh bha ka dei ruh namar ba ki don ki shnong kiba don ïa kajuh ka kyrteng hapdeng ki shnong Khasi, Garo bad Assamese kiba lah ban pynkulmar bad pynbakla ha ka jylla aïu kitei ki shnong ki hap.
