Williamnagar, Nailar 21
U Myntri Rangbah ka Jylla, u Conrad K. Sangma ha ka Lah Sngi U Blei u la plie ïa ka Williamnagar Municipal Office-cum-Market Complex ba dang shu dep shna thymmai ha Soil Bazar, Williamnagar ha ryngkat ka jingdonlang u Myntri ka tnad PHE, u Marcuise Marak bad MLA ka Rongjeng, u Jim Sangma.
Haba ai jingkren ha ka jingïalang, u Sangma u la ong ba la pdiang ïa ka jingdawa na bynta ki projek kiba ïar ha kylleng ka Jylla bad ka Sorkar ka minot ha ka ban pyntreikam ïa kine ki projek hapoh ka por ba la buh.
“Ka Sorkar jong ngi ka la sdang ban pyntikna ha ka ban thaw ïa ki jingtei ym tang haba ïadei bad ka jingpynwandur ïa ki. Ka dei ka jingtrei shitom ban pynkup bor ïa ka imlang-shalang, ban kyntiew ïa ka ïoh ka kot bad ban thaw lad na bynta ka rukom im kaba kham bha jong ki nongshong shnong,” u la ong.
“Ka Sorkar jong ngi ka ithuh ïa ka bynta ba kongsan ba ki jingtei bad ki lad pynïasoh lyngba ki surok ki don ha ka ban pynïasoh ïa ka imlang-sahlang, ban kyntiew ïa ka ïoh ka kot bad ban pynbiang ïa ki lad ki lynti na bynta ka kamai kaba kham bha. Ka long kaba donkam ïa ngi ban pyntikna ba man la ki nongshong shnong ki lah ban ïoh jingmyntoi na kine ki kam pynroi. Ngi ïohi ïa ka Meghalaya ha kaba ki briew jong ngi ki ïoh bynta ïa kiei-kiei ba katkum ka juk ba mynta, ka pule-puthi kaba paka bad ka jingmanbha ha ka koit ka khiah,” u la ong.
U la pynbna ruh ba ka Sorkar kan sa pynbha ïa ka Rongrenggre Higher Secondary School – kawei na ki skul kaba la rim tam hapoh ka distrik ha ka kyrdan pule ‘Higher Secondary’ ban pyntikna ïa ka pule-puthi kaba bha na bynta ki khynnah.
Na ka liang u Myntri Rangbah u la pynsngew ruh halor ki kam ba ïadei bad kiwei pat ki projek kiba dang ïaid, ba kynthup ïa ka jingpyntrei ïa ka Williamnagar College kaba la poi sha ka kylla bakhatduh bad ka jingpyntrei ïa ka Mini Stadium ha Williamnagar. Ha kane ka sngi u Sangma u la jurip ruh ïa ka surok ba dang shu dep shna ha ka shnong Rangmal Badim bad Chidekgre.
Shuh shuh u la ban jur halor ka jingtrei minot jong ka Sorkar ban pyntikna ba ka roi ka par ka poi sha baroh ki kyndong kynshrot jong ka Jylla khlem da kheiñ ïa ka jinglong-jingman jong ka jaka.
Ha kane ka sngi, u Myntri Rangbah u la sam ruh ïa ki ‘Digital Learning Aid’ (M-Tab) sha ki khynnah pule ka Williamnagar hapoh jong ka Chief Minister’s Digital Learning Aid na bynta ka skhim ki khynnah pule. U la sam ruh ïa ki tynrai ‘long’ sha ki nongrep ka East Garo Hills District kum shi bynta jong ka ‘Spice Mission’, kaba thmu ban pynkupbor ïa kito ba ïadon bynta bad ka rep ka riang.
