Shillong, Nailar 21
Hadien ka jingartatien kham mynshwa, ka Sorkar Jylla mynta ka la pynskhem ban tei beit ïa ka patok kaba kham heh ha New Shillong Township (NST) bad ïa ka jaka ruh la dep ïa kylliang hapdeng ka tnat patok bad ka tnat pynroi sor.
Katkum ka jingïapynbeit hapdeng ka tnat pynroi sor bad ka tnat patok, la ong ba ka tnat pynroi sor kan ïoh ban shimti ïa ka patok kaba don mynta ha Jail Road, katba ka tnat patok kan ïoh ïa ka jaka ha NST kaba heh kumba 25 akar.
Ka Sorkar ka dang thaw lad mynta ban ïoh jingkyrshan pisa ban tei ïa ka patok kaba thymmai namar ka patok kaba don mynta ha Jail Road ka dei kaba rit.
U Myntri ka tnat pynroi sor, Bah Sniawbhalang Dhar u la ong ba ka tnat pynroi sor kan sa pyrkhat kumno ban pyndonkam ïa ka jaka ha Jail Road ynda la dep ban tei ïa ka patok ha NST.
U la ong ba ka tnat kan sa pyndonkam ïa ka jaka ynda la dep tei ïa ka patok kaba thymmai.
Nalor nangta u la ong ba ka patok kaba thymmai kan sa don ki jaka ai jinghikai ruh ïa ki koidi namar ka patok kam dei tang ban set hynrei ban pynkylla bad tei thymmai ïa ka rukom im jong ki ha ka imlang sahlang khamtam ynda ki koidi ki la dei ka por ban lait noh na patok.
