Jowai, Nailar 21
Ka Dorbar Shnong Lapangap ka la khang pyrshah ïa ka leit ka wan hapdeng ki Pnar bad ki Karbi khamtam ïa kito kiba leh ïa ki kam khaïi-pateng.
Ïa kane ka rai la shim ha ka jingïalang kaba la long ha ka Lah Sngi U Blei.
Ka Dorbar Shnong Lapangap ka la kyntu jur ruh ïa ki shnong kiba marjan ba kin ïatylli lang kawei bad ban ïa mih paidbah lada ka dang don kano-kano ka jingpynwit na ka liang ki Karbi nangne shakhmat khamtam ha ki jaka rep ki jaka riang ki jong ki.
Kane ka jingshim rai ka Dorbar Shnong Lapangap ka la long ruh hadien ba ka shnong Lapangap ha ka 18 tarik Nailar ka la mad ïa ka jingjia ba sngewsih na ka jingwan tur jong u paidbhur Karbi kiba la phut dusmon ïa ki tynrai dieng ba la thung ha Pynthor ba la ai da ka tnat Basin Development naduh u bnai Jylliew ba la dep ban pynjyrngam ïa ki sawdong sawkun.
Lah ban pynkynmaw hangne ba hashwa katei ka jingjia, ki nong Karbi ki la wan jynrat teng ïa ki tynrai dieng ha u bnai Naitung ha ka jaka ba la tip kum Lum Moo Pyrdet Pynthor kaba hap hapoh ka jingsumar sukher ka shnong Lapangap.
Kumta ki nongshong shnong ka Lapangap haba ki ïoh jingtip halor kane, ki la hiar bran-bran sha katei ka jaka ban ïada ïa ki tynrai dieng. Ha kane ka jingpyrshang jong ki nongshong shnong Lapangap ban ïada ïa ki tynrai dieng na ki Karbi ka la pynlong ba kin ngat pynban ha ka jingshah ther maw ha ki nong Karbi. Ha kane ka jingjia ym shym la don satia kiba mynsaw.
La lah ban tem ïa kane ka jingjia ha ka 18 tarik Nailar da ka jingdon ki pulit na baroh ar liang ki jylla.
