Shillong, Nailar:
Ka Khasi Students’ Union (KSU) ka la ong ba ki samla pule kim dei ban duhnong na ka jingpyntreikam ïa ka National Education Policy (NEP) tang namar ka jingsngewkhraw jong ka NEHU bad kiwei-kiwei.
“Ka jingpyntreikam ïa ka NEP ha kine ki khyndiat bnai ba la dep, ngi ïohi ba bun palat ki kynrum-kynram ha kaba ka skulbah ka la rai ban ïaid shakhmat bad kane ka bynta,” la ong u Assistant Secretary ka KSU, samla Reuben Najiar hadien ka jingïakynduh bad u Vice-Chancellor (VC) ka NEHU, Prof. P.S. Shukla ha ka Sngi Thohdieng.
Haba pynsngew ba u VC u la lum ïa bun tylli ki jingïalang hapdeng ki nonghikai, Principal bad tnad Sorkar halor kumno ban pyntreikam ïa ka NEP, u samla Najiar u la ong ba katkum ka jinglum khubor ka seng, la shem ba ka NEP ka dang don katto-katne ki jyrwit-jyrwat – ki ‘Syllabus’ kim pat biang, ki jingdonkam na bynta ki samla pule kim pat biang bad wat ki ‘Guidelines’ kim pat long kiba shai.
Halor ki nonghikai kiba pyrshah ïa ka jingpyntreikam ïa ka NEP, u la ong ba ka seng ka la dawa ba u VC u dei ban shimkhia ba ki nonghikai kin wan sha ka miej ïakren, ha kajuh ka por, kino-kino ki jingpynsngew ba ki nonghikai ki pynpaw, u VC u dei ban pynbeit ïa ki khnang ba ki samla pule kin ym duhnong.
Utei u nongïalam u la ong ruh ba kumba ka long mynta, watla ki kolej ki pyntreikam ïa ka NEP, hynrei ki nonghikai kim shim ïa ki klas bad ha kaba khatduh ka jingdunong ka dei jong ki samla pule.
“Ka seng ka wan ban dawa ba ki samla pule kim dei ban duhnong lyngba ka jingpyntreikam ïa ka NEP tang namar ka jingsngewkhraw jong ka skulbah ne kiwei-kiwei (stakeholder),” la ong u samla Najiar.
Ka seng ka la pynpaw ruh ka jingkmen ba u VC u long uba kloi ban ïakynduh ïa kino-kino ki liang kiba pyrshah ïa ka NEP bad na ka liang ka seng, ka phah ka kyrwoh sha ka Sorkar ba ka dei ban khot noh ïa ka jingïalang ba kyrkieh hapdeng ki nonghikai (ba pyrshah NEP) bad ka NEHU khnang ban pynshai halor ki mat jingpyrshah bad ban poi sha ka rai kaba ïabeit lang da baroh.
“Ka dei ban don noh ka jingïalang hapdeng ka skulbah, Sorkar bad MCTA khnang ban wan sha ka miej ïakren bad ban ai ïa kaba bha tam sha ki samla pule,” la ong u Assistant Secretary.
Shuh shuh u la bynrap ba ka seng ka la ïakynduh ïa katto-katne ki kolej bad ka don ïa ki ‘Minutes’ jong ka jingïalang ha kaba bun ki Principal ki la pdiang ïa ka jingpyntreikam ïa ka NEP.
Na ka liang jong u, u la kdew ba ka Sorkar ka la kular ba lada don kano-kano ka jingeh, ka long kaba kloi ban ïarap ïa ki kolej ha kano-kano ka liang.
