Shillong, Nailar 21
Kiba leit jingleit da ka liengsuiñ bad leit shong liengsuiñ na Lokpriya Gopinath Bordoloi International Airport (LGBIA) ha Guwahati, mynta kim donkam shuh ban ïeng ha u laiñ bajrong hashwa ban ïoh rung shapoh.
Namar ka jingpyntreikam ïa kawei ka kor kaba tip kum ka ‘Digi Yatra’ ha kane ka kad liengsuiñ, ki nongleit jingleit mynta ki lah ban pynrung kyrteng ïalade bad ki kot ki sla jong ki lyngba ka ‘Digi Yatra’ app bad kin ïoh ban rung shapoh ka lad liengsuiñ da kaba shu pyni ïa ka durkhmat ha kaba ka khyrdop kan sa plie hi ynda la dep ithuh ïa ka durkhmat jong kito kiba la dep pynrung ïa ki kot ki sla.
Kane ka ‘Digi Yatra’ la sdang pyntreikam da ka Sorkar Assam ha Lokpriya Gopinath Bordoloi International Airport (LGBIA) naduh ka sngi U Blei, ha kaba u Myntri ka Sorkar Assam u Chandra Mohan Patowary u la ong ba kum kane ka kor treikam la pyntreikam ha ka sien banyngkong ha ka Thaiñ Shatei Lam Mihngi (North East).
U la ong ba baroh shikatta, ki paidbah ki hap ap bad ïeng ha u laiñ bajrong ha kane ka kad liengsuiñ, hynrei kane kan dei noh ka rukom leh kaba mynshwa namarba mynta la pyntrei ïa ka ‘Digi Yatra’ app.
Kane ka rukom pyntreikam ïa ka ‘Digi Yatra’ ka don lai bynta ha ki kad liengsuiñ kiba heh; kita ha jaka rung, jaka shah peitbniah bad jaka ban leit kiew liengsuiñ.
La ong ba kane ka sienjam kaba pyntreikam ka long ban pynsuk ïa ki paidbah kiba leit jingleit da ka liengsuiñ, bad la khmih lynti ba baroh kiba ju leit kiew liengsuiñ na Guwahati kin pyndonkam ïa kane ka lad ha ki por ban sa wan.
Kane ka kor ka ailad ïa kiba shong liengsuiñ ban lait na ki jingpynwit bad ïoh ïaid suk kito kiba shong liengsuiñ bad ki lah ban ïaid lyngba ki jaka ba ju peitbniah tang da kaba pyni ïa ka durkhmat kaba tip kum ka Facial Recognition Technology (FRT).
Kumba ka long mynta, ka ‘Digi Yatra’ ka dang treikam tang ïa kiba leit jingleit da ki liengsuiñ ka Indigo bad Akasa, bad kiwei pat ki liengsuiñ ruh ngeit skhem kin sa bud lang.
